كلهم مجانين .... كلهم مجانين " قصص تبدو واقعية "

كان اليوم في اوله .....

ابتسمت ابتسامه واسعه ، عايزه اصبغه اصفر ، اصفر دهبي ، دهبي خالص ، زي جوليا روبرتز ..يترك المشط من يده ، وينتقي الفاظ رقيقه ويحاول معها ، ياانسه والله ماينفعش ، ليه ماينفعش ، اصل بشره حضرتك يعني لونها ، لونها ... ايه قصدك لون بشرتي مايليقش علي الاصفر ، مالكش حق خالص ، دي حتي بشرتي لونها جميل !! يرتبك ويبتسم ، طبعا ياانسه طبعا ، مش قصدي ..اشعلت سيجاره واكدت عليه اصفر دهبي لون شعر جوليا روبرتز !!

ضحكت سيده تحت السشوار وهمست لجارتها تحت السشوار بصوت مرتفع نسبيا بسبب الوش في دماغهم ، هي جوليا روبرتس شعرها لونه اصفر دهبي ، ضحكت السيده الاخري واشاحت بيدها مامعناه سيبيكي منها !! كاد يبكي ، طيب نعمله بني ، بني اخيييييييييه مابحبش البني انا عايزاه اصفر ودهبي !!

دخلت انسه تتشاجر في تليفونها المحمول ، وانا اعمل ايه يعني ، الشوارع زحمه موت ، وانا لازم اعمل شعري ، طيب طيب ، وتغلق الخط ، تتجه لصاحب المحل ، ممكن تعملي شعري بسرعه ، انت شايف اهو احمد عمال يتخانق معايا ، ابتسم الرجل بادب وعينيه تسالها احمد مين ، اجابته قبل سؤاله ، احمد خطيبي ، رفع حاجبيه اندهاشا ، يعرفها ويعرف امها وعائلتها وعلي حد علمه هي مااتخطبتش ، تداركت نفسها ، قصدي اللي حيخطبني ، اصل مستنيني في الشارع وعمال يتخانق ، اشار لها علي السيده التخينه اللي عايزه تصبغ شعرها اصفر معتذرا ، عندي شغل !!

فكرت قليلا وقررت تستأذن من السيده ، ممكن ياطنط يعمل لي شعري بسرعه ، خبطت السيده التخينه بذراع مليء الاساور الذهبيه علي صدرها ، طنط ، طنط مين ياحبيبتي ، انا يادوبك من دورك ، انتفض صاحب المحل يشرح للانسه المستعجله ، اصل الانسه ، رفعت حاجبيها دهشه ، اكمل مسرعا ، ايوه الانسه واخده ميعاد من زمان ، صرخت السيده التخينه ، وانا كمان ورايا مواعيد وفيه حاجه اسمها دور ولا ايه يامسيووو ، ضحك صاحب المحل ، طبعا ، اشار للانسه الصغيره لتجلس ، حالا حاكون معاك ، صرخت فيه السيده التخينه ،حالا ازاي وانا ، شكلك بقي ناوي تكروتني ، الشغل ده ماينفعنيش !!! ابتسم صاحب المحل واشعل سيجاره وعد حتي الف ، تحت امرك قررتي حضرتك ايه ،ضحكت ،الا يامسيوووو مالكش حق ، ااقول تور تقول احلبوه ، اصفر دهبي يعني اصفر دهبي ، ابتسم يائسا ، عيني !!!

صرخت السيده التي تعمل ضوافرها ، اي اي مش بالراحه شويه ، ابتسمت العامله ، سوري ، لا دي مش اول مره ، حتقطعي صوابعي ، الحقني يامسيو ، ترك صاحب المحل الصبغه الصفرا ونهر العامله ، بالراحه يابنتي ، والله بالراحه خالص يامسيو ، صرخت السيده ، كدابه انا بقي وباتبلي عليك !!! ضرب صاحب المحل السيده باللوكاميه في كتفها ، ماقلنا بالراحه ، انهمرت دموع العامله فورا ، انتفضت السيده ، لا كده بقي تو تو تو ماتش ، كمان حتعيطي !!! ابتسم صاحب المحل في وجه الزبونه ، ماتقلقيش يامدام ، هي لما بتعيط بتشتغل حلو ، هزت العامله راسها توافقه ، اسفه يافندم ، طيب يالا يالا بس حاسبي اوعي تعوريني !!!

خرجت السيده من تحت السشوار متأففه ، ايه يامسيو ده ، السشوار سخن خالص راسي خلاص ولعت ، ابتسم صاحب المحل ،علي العموم خلاص زمان شعرك نشف ، جلست متأففه ،عاد صاحب المحل للصبغه ، ناشدته الانسه الصغيره ، ممكن بسرعه شويه ، صرخت السيده التخينه ، يوه يوه كده حيتخلبط ومايعرفش يلاقي صبغه صفرا دهبي ، ارتبكت الفتاه الصغيره وصمتت ، ابتسم صاحب المحل يطمئنها ، لا خلاص لقيتها بس انتي برضه لسه مصممه ، ضحكت السيده ، جداجدا ، ده حاابقي قمر ولا ايه ؟؟ هز راسه يوافقها ، قمر اربعتاشر كمان ، ابتسمت واخذت تحدق في المرأه فرحه بشكلها ، انا بقول كده ، الاصفر الدهبي حيبقي عسل ، همست لصاحب المحل ،اصل ناس كتير بتقول اني شبه جوليا روبرتز الفرق في لون الشعر ، انفجرت السيده تحت السشوار في الضحك وصمتت بسرعه !!!

مالت السيده الي بتعمل ضوافرها علي السيده اللي خارجه من السشوار سالتها ، ماجيتيش الدرس امبارح ليه ، ضحكت السيده اللي خارجه من السشوار ، كان عندي ضيوف ، تحسرت السيده اللي بتعمل مانكيير ، فاتك درس رهيب ، الشيخه قالت كلام كتير هايل جدا جدا ، سالتها السيده اللي خارجه من تحت السشوار ، قالت ايه ، صمتت قليلا ثم اشاحت بيدها ،مش فاكره بس لو ركزت حافتكر ، وانفجرا في الضحك!!!

فتح صاحب المحل التليفزيون يتابع الماتش ، والنبي توطيه شويه يامسيوووووووو لحسن دماغك والعه ، ينظر للسيده التخينه ولا يتحرك ، تناشده الست تحت السشوار ، من فضلك مسيو ، ينفع تغير المحطه ، ينتفض غاضبا يقفل التلفزيون ويفتح الراديو ، جايين الدنيا مانعرف ليه ، مصمصت الست التخينه شفايفها ، اه والنبي ياخويا جايين للشقا!! نظر لها صاحب المحل نظره ذات مغزي وهمس ، انتم برضه اللي جايين للشقا ؟؟ !!!

دخلت سيده منقبه المحل ، سالت بلهجه عربيه ، اكو قسم نسوان ، هز صاحب المحل راسه نفيا ،للاسف لا ، يعني ماكو نسوان تعمل للنسوان ، هز صاحب المحل راسه نفيا ، لا ، رفعت النقاب من علي وجهها وابتسمت ، مو مهم ، واشعلت سيجاره تراقبها السيده التخينه بفضول ، نظرت السيده اللي كانت منقبه للعامله وسالتها ، بتعملي سويت ، رد صاحب المحل ، النهارده ماينفعش المحل زحمه ، ابتسمت السيده التي كانت منقبه وافهمته ، ماكو مشكل وقتي طويل ، التقطت مجله فنيه ودفنت راسها فيها وصمتت !!!

بدأ صاحب المحل في فرش الصبغه في راس السيده التخينه ، وهي لاتكف عن الكلام ، ايوه كده ، حلو كده ، ده حيبقي يجنن صح ؟؟ لايرد عليها ، معندكش حد يعمل شاي ، الانسه لما تخلص تعمل لحضرتك شاي ، لا بقي بعد ماتلعب في الضوافر تعمل لي شاي ايه القرف ده ، مازالت العامله تبكي وعندما سمعت كلام السيده التخينه ازداد بكاءها ، تأفأفت السيده اللي بتعمل ضوافرها ، وبعدين بقي ، يامسيو ده احنا كده في عزا ، البنت حتبوظ صوابعي ، مش شايفه حاجه من كتر العياط ، صرخ صاحب المحل في العامله ، قومي اغسلي يابت وشك وارجعي بسرعه كملي شغلي ، وابتسم للسيده في برود ،سوري ياهانم ، سالته السيده المنقبه ، بتعمل ماش ، هز راسه ، اه ، سالته ، بتعملوا تاتوه هنا ، هز راسه نفيا ، احنا كوافير ، ضحكت عارفه صالون حلاقه حريمي عارفه ، عندنا بيعملوا تاتو ، سالتها السيده التخينه ،عندكم فين يااختي ، ابتسمت المنقبه وصمتت لم ترد عليها ، ارتبكت السيده التخينه وبعصبيه شديده لامت صاحب المحل ، ايه الاشكال القرف اللي بتدخلها محلك دي ، سالت سؤالها السخيف بصوت عالي لتسمعه السيده التي كانت المنقبه ، سمعته السيده التي كانت منقبه ولم ترد عليها لكنها سالت صاحب المحل ، بالله عليك يااخ طمني هو الاكسوجين بيحرق الشعر ولا بيصفره بس ، زفر صاحب المحل الانفاس الساخنه وادرك ان مشاجره علي وشك تبدأ ، ياهانم معندناش اكسوجين دي صبغه ، انتفضت السيده التخينه ، حاسب تحرق شعري يامسيووووووو ، مازال يفرش الصبغه في الشعر ، هز اكتافه نفيا ، ياانسه ماتخافيش ، ضحكت السيده التي كانت منقبه واشعلت سيجاره تانيه وتجاهلت الامر كله ، ظلت السيده التخينه خائفه تساله كل دقيقه ، هي الصبغه دي بتحرق الشعر ، لا ، لاتصمت وتكرر سؤالها ، احس الاختناق ، قذف فرشه الصبغه في الطبق ، وبعدين يامدام ، سالتني وقلت لحضرتك لا ، ارتبكت السيده التخينه وهمست ، ماهي المدام هي اللي قالت ، نظر لها صاحب المحل نظره مخنوق يحتضر وصمت واكمل صبغ الشعر !!

همست السيده اللي تحت السشوار للسيده الاخري ، امبارح في الدرس كان فيه بنت قمر امبارح وكلاس جايه الدرس ، عروسه حلوه ، مامته العريس كانت جايه تشوفها ، سالتها السيده ، وبعدين عجبتها ، العروسه عجبت ام العريس جدا ، لكن ام العريس ماعجبتش العروسه ، قالت عليها بلدي مع ان عبايتها وطرحتها كانوا كلاس جدا ، امال ماعجبتهاش ليه ، ضحكت السيده ، قال جزمتها بلدي ، هزت السيده راسها ، ماهي كده معاها حق برضه ، ماهي الست تبان من جزمتها ، وانفجرا في الضحك !!!!

رن تليفون الانسه المستعجله ، ايوه ، لسه ، لسه ، وانا اعمل ايه يعني ، واقف في الشارع ، انا يعني اللي نايمه في السرير ، يرتفع صوتها اكتر واكثر ، اعمل ايه يعني ، خلاص امشي ، ايوه امشي ، تصمت طويلا ، ثم تنفجر في البكاء ، اوكي ، وتقذف المحمول بعيدا ، يسقط علي الارض ، تخبط السيده التخينه علي صدرها ، يانصيبتي ، تقوم العامله تلم اجزاءه المبعثره ، تصرخ السيده التي تعمل ضوافرها ، وبعدين بقي شكلي كده حابات هنا ، يزيح صاحب المحل العامله وهو يصرخ فيها ، روحي انت كملي شغلك ، يخاطب الانسه المستعجله ، اهدي ياانسه ، يناولها المحمول ، تقذفه بعصبيه في الشنطه وهي تبكي بقوه ، اصل ياعمو احمد عصبي قوي قوي ، مستنيني في الشارع وعمال يهزء في ، ايه القرف ده ، نظر لها صاحب المحل نظره ذات مغزي ، احنا لسه علي البر ، اذا كان من اولها عصبي كده ، مابلاش احسن ، احمر وشها وهمست ، بس هو طيب وبيحبني قوي ، ابتسم صاحب المحل وصمت !!!

تهز الست التخينه راسها ، ماتعمليش في نفسك كده يااختي ، محدش يستاهل ، ثم تسال صاحب المحل ، هي مستعجله قوي ، خليها تيجي دوري طيب واعملها شعرها ، يرفض صاحب المحل ، ماينعفش اسيبك في النص ،خلاص حاخلص الصبغه واعمل لها طول ، تتفاعل معها السيده التخينه ، ياحبيبتي ماتعيطيش هما الرجاله كده جتهم نصيبه تاخدهم ، ثم تنظر لصاحب المحل اسفه يامسيووو اسفه والنبي ماقصدي بس صوعبت علي !! يبتسم صاحب المحل ويكمل الصبغه!!!

تبتسم عامله المانكيير ، اي خدمه تانيه ، تنظر السيده في اظافرها متأففه وتهز راسها ولا تنطق ، تنادي السيده اللي كانت منقبه العامله ، ياصبيه ، تنمصي الحواجب ، لاتفهم العامله ، تمنصيها تمنصيها بالملقط ، يهز صاحب المحل راسه ، تحت امرك ايوه بتعمل حواجب ، تقترب منه العامله لاتفهم ، يزغدها في كتفها ، فتحي راسك مع الزباين ، حيبقي قصدها ايه يعني ، اكيد قصدها تنضيف الحواجب ، اتلحلحي ومشي حالك ، تساله السيده اللي تحت الشسوار ، خلاص ولا ايه ، يضحك ، من زمان ، انا نسيتك اصلا ، تقوم غاضبه ، حرام عليك جالي صداع ، يضحك يمازحها ، لا انت جايه بصداعك ، تضحك وتنسي وتجلس في طابور الانتظار ، تقوم السيده التخينه وتخلي المقعد وتساله وهي تقوم ، الوليه بتضحك علي ايه ، يهمس ، مالناش دعوه ، تضحك ساخره ، والنبي تلاقيها مافهمتش انت بتقول ايه اصل محدش بيفهمك غيري ، لعبت حواجبها ، سايرها نفاقا ، طبعا طبعا !!!

قفزت الانسه الصغيره وجلست علي المقعد امام صاحب المحل ، وقفت بجواره السيده التي كانت تحت السشوار وطلعت الاول ، سالته باصرار ، هو مين عليه الدور ولا هي فوضي ، اعتذر لها ، اصل وراها ميعاد ، رفضت عذره ، انا كمان ورايا ميعاد ، تدخلت الست التخينه في الحديث ، ماعلش الدنيا مش حتطير اصلها عيله ووراها ميعاد ومفحومه من العياط ، نظرت لها السيده شذرا ، حضرتك بتكلميني؟؟ ضحك السيده التخينه والصبغه فوق راسها ، امال بكلم امي ، الحقنا يامسيوووووو ، ظلت السيده واقفه بجوار الكرسي مصممه علي دورها ، احتار صاحب المحل ، قامت الانسه الصغيره مرتبكه ، اعتذرت له ، حابقي اجي في وقت تاني ،خلاص الدنيا باظت ، جلست السيده علي المقعد غاضبه متأففه ، لازم يكون فيه احترام للدور والا تبقي فوضي خاااااالص ، ودعت الانسه السيده التخينه ، باي باي ياطنط ، قفزت السيده التخينه من مكانها ، تاني ياطنط انت مستقصداني بقي ، الحقنا يامسيوووووو ، خرجت الانسه الصغيره من المحل والسيده التخينه تتابعها غاضبه ، ال طنط ال وانا اللي كانت صعبانه علي ، حقه اللي تحسبه موسي يطلع فرعون !!!

سالته السيده التي كانت منقبه ، اكو تليفون ، تعجب لانها تحمل المحمول في يدها ، اشار لها علي تليفون المحل ، طلبت نمره واجرت حديثا هامسا ، ممضوغ الكلمات ، انا في الصالون ، ساعه .... بالضبط ، ساكه المحمول علشان جوزي مايوصلني ، ضحكت ، حاتصل بك قبل خروجي ، وجلست مكانها وكانها لم تفعل شيئا !!! قص صاحب المحل شعر الزبونه التي كانت في السشوار وخرجت اولا ، ابتسمت ، فيري جود ، الكت تحفه ، ضحك صاحب المحل ، تسلم ايديك مسيو ثانكيو فيري فيري ماتش ، اخذت حقيبتها ولوحت لصديقتها ، باي ، اشوفك بكره بقي في الدرس ماتتاخريش ، وافقتها صديقتها اوكي سويتي ، باي باي .. سالت الست التخينه باستهبال ، دوري انا اجي ، ابتسم صاحب المحل ، لسه الصبغه قدامها شويه وقت ....

فتح الكاسيت ، نجاه الصغيره ، ضحكت الست التخينه ، مسيووووووووو مسيووووو معندكش ياحبيبي ساكن قصادي وبحبه ، هز راسه نفيا واشار للمنقبه ، اتفضلي ياحاجه ، اشعلت سيجار و خلعت الطرحه ، ابي كودوبن سريع ، بس بالله عليك ، صمتت وخفضت صوتها ، كاني جوه في القسم النسائي ، اي حد يسال عني ، الحاجه جوه ، هز صاحب المحل راسه ، ظروف والله ظروف وماحب حدن يتدخل فيها ، اشعل النار ووضع عليه المكواه الحديد ، ابتسمت ، اتفقنا ، انا حاذهب واعود وانت اللي بتبيه بتاخده الفلوس ماتهمني ، نظر صاحب المحل للست اللي كانت منقبه ، عيون كحيله فاجره وميوعه واضحه ، اشعلت سيجارتها وابتسمت ، اتغاظ منها ، هي فاكراني ايه ، قرني ، نظرا لها شذرا واطفي ء النار وابتعد يشرب سيجاره ، تمالك اعصابه وهمس ،بقولك ايه ياحاجه ياريت تلبسي راسك وتتكلي علي الله ، المحل هنا محترم ومعندناش قسم حريمي ومش حاقول لاي حد اي حاجه ، مع السلامه ياحاجه نورت ، وفتح باب المحل ووقف بجواره غاضبا عينه بتطق شرار ، قامت غاضبه وارتدت طرحتها ونقابها وخرجت تصفع الباب وراءها ، يتابعها صاحب المحل بنظره ينفث حلقات دخانه ، سالته العامله ، المدام مشيت ليه ، نهرها ، خليك في نفسك ، لامته السيده التخينه ، ياخويا كنت سايرها وكل لقمه عيش ، رمي صاحب المحل السيجاره من يده غاضبا ، الله الغني ياستي ، ملعون ابو ام العيش اللي يجيي من صياعه النسوان !!!

تجلس الست التانيه اللي كانت تحت السشوار علي المقعد امام صاحب المحل ، يسرح شعرها وهي تتكلم في المحمول !!! دخلت المحل سيده عجوز تضحك ، صباح الخير وتضحك ، نادت عامله المانيكير ، المره اللي فاتت ضوافري كانت بايظه زباله وتضحك ، ازيك يامسيو وتضحك ، السيده العجوز ملامحها طيبه ولاتكف عن الضحك ، عواصف ضحك عاتيه تضرب في جنبات المحل ، تحكي قصه زوجها المجنون الذي طرد عامل النور لانه ضرب الجرس بصوت عالي وتضحك ، تسخر من زوجها ، والراجل ماله هو اللي ركب الجرس وتضجك ، تسال صاحب المحل ، قدامك كتير ، يشاور لها علي السيدتين ، تضحك وماله انا ماورايش حاجه ، تقترب من السيده التخينه ، تلاحظ الصبغه علي راسها صفراء ، الصبغه دي حتبقي جنان عليكي وتضحك ، تضحك السيده التخينه وتشكرها ، تقص علي صاحب المحل فيلم سهره الامس ، والراجل قتل الست موته بشعه وتضحك ، يضحك صاحب المحل ، تضحك العامله ، تضحك الزبائن ، تضحك علي ضحكهم ، الراجل قتلها وانبسط ، تضحك ، جوزي زيه كده ، لما تحصل نصيبه يبقي عايز يقتلني وتضحك ، يضحك الجميع....

فجأ تصرخ الست التخينه ، راسي مولعه ، شعري حيقع ، كده برضه ، ينتفض صاحب المحل يقترب منها ، يمد اصابعه بين خصلات شعرها ، يافندم مافيش حاجه ، تصرخ ، راسي وانا افهم بيها اكتر منك ، ايش فهمك انت ، تجري علي الحوض اغسل الصبغه اغسلها ، راسي حتولع ، يجري يغسل راسها ، تضحك وتهمس له ، اصل لولا كده كنت حتسيبني ملطوعه حبيبك النبي ماتزعل مني ، يكاد الرجل ينفجر ، تناديه السيده علي الكرسي ، بليز انا متأخره قوي ، تضحك السيده العجوز ، تذكر صاحب المحل فاكر الست اللي شعرها قلب من الصبغه بنفسجي ، ترتعب السيده التخينه ياسنه سودا وحصل ازاي ده ، شعرها يلمع اصفر ذهبي ، لاترد السيده العجوز لكنها تضحك ، حلو الذهبي عليك !!!

تدخل ام وطفلها الصغير ، هاي ، عايزه احلق له ، يعتذر صاحب المحل ، المحل زحمه ومعندش وقت ، تضحك الام وماله نستني اصله مصمم محدش يحلق راسه غيرك ، تجلس الصغير بجوارها لكنه يقوم مسرعا ، يكاد يخطف المكواه من فوق النار ، تصرخ السيده علي الكرسي وتصرخ الام وينتفض صاحب المحل يبعده عن النار ، يامدام من فضلك خليه جنبك ، تناديه الام الصغيره ، تعالي هنا بلاش شقاوه ، تنادي الست التخينه عامله المانكيير ، تعالي ياشابه احط اكالادور ، تجلس العامله تحت قديمها وتصمت تمام ، بس حبيبك النبي ماتعوريني ، تهز العامله راسها وتصمت تماما !!!

يقترب الطفل من سبت البوكلات ، ياخذ واحده ويقذف بها امه ، يتوتر صاحب المحل ، يامدام ، تناديه امه ، بيبي تعالي بلاش شقاوه ، نو ، نو ، لايسمع الصغير كلامها ، صاحب المحل يكاد ينتفجر من التوتر ، يلسع الزبونه فوق الكرسي في جبتهها ، تصرخ ، تضحك السيده العجوز ، يبكي الطفل يكره الجلوس جوار امه ، تفتح له باب المحل ، تلعب هنا لاتروح ولاتيجي ، يوافقها ويخرج مسرعا ، تنصحها السيده التخينه ، عينك عليه ياحبيبي الا الضنا غالي ، تصرخ في العامله ، اي اي ان شالله تنشكي في قلبك ، بالراحه يااختي شويه ...

تدخل سيده بعيون حمراء ، تجلس بعيدا ، تشرح لصاحب المحل ، مش لاقيه حته اعيط فيها ، يضحك صاحب المحل ، وماله اتفضلي عيطي براحتك ، تضحك السيده التخينه ، الا حقه وهو العياط له مكان ، تضحك السيده العجوز ، وتيعطي ليه ياماما روقي كده روقي ، تبكي السيده ذات العيون الحمراء ، تبكي وتبكي ،يناولها صاحب المحل كوب ماء ، ياست روقي ابوس ايديك ماانت عارفه طبعه !!!

تخرج السيده اللي كانت فوق السشوار من المحل سعيده بتسريحه شعرها ، تخرج بعدها السيده التي كانت تعمل مانكيير ، مازالت العجوز تضحك ،تحكي خناقتها مع زوجها ، اتجنن خالص خالص ، ماانت عارفه يامسيو مجنون مجنون وتضحك ، ال ليه وليه الجيران بيخبطوا ، مايخبطوا براحتهم ، بيتهم وهما حرين فيه ، عايز يقوم يتشم الجيران ، اصله حمقي ماانت عارفه يامسيو حمقي خالص خالص وتضحك ، يفتح صاحب المحل الراديو ، دي حكايتي مع الزمان ، تشدو ورده ، تهز السيده التخينه راسها تتمايل مع الاغنيه وتنفجر فجأ في البكاء ، تشرح للسيده العجوز ، حياتي بعيد عنك تغم ، ربنا يخلي اللي بيتخانق ، انا بقي قرد قطع لا انيس ولا جليس ، تبكي بحرقه ، تنفجر العجوز في الضحك ، خلاص خديه والله ماهو راجع ، تسالها الست التخينه ، اخد مين ياحبيبتي ، تضحك السيده العجوز ، جوزي خديه حبه يتخانق ويسليكي ، وتنفجر في الضحك ، تضحك السيده التخينه وسط دموعها وتكمل عياط ، تجري عامله المانكير وتتناولها كوب ماء ، تبكي وتشحتف ، حياتي صعبه فاضيه خالص ، بحاول اشغل نفسي ، باكل قطط الجيران اه والله ، بيصعبوا علي ، تضحك العجوز ، خدي جوزي اكليه احسن ، يضحك صاحب المحل وعامله المانكير ، كان ده كان ، مازالت تغني ورده ، يسمعوا فرمله قويه في الشارع ، تجري الام خارج المحل ، تصرخ ابني ابني ، خلفها صاحب المحل والست العجوز ، تصرخ الست التخينه ، ياضنايا ياابني ، تجري العامله خارج الباب ، تدعو السيده التخينه جيب العواقب سليمه يارب ، يدخلوا جميعا والصغير في ايديهم ، تنهال امه علي وجه بالضرب والتلطيش ، نوتي بوي نوتي بوي ، تضحك السيده العجوز ، وده وقت انجليزي ، تنفجر السيده التخينه من الضحك !!!

يامسيوووووووو دوري امتي ، مازالت السيده ام عينين حمرا بتبكي ، يشاور لها صاحب المحل اتفضلي ياانسه ،تجلس السيده التخينه علي الكرسي ، رايك ايه ، لايفهم صاحب المحل ، رايك ايه ، كده بقيت الخالق الناطق جولياروبرتز ، يهز صاحب المحل راسه ولاينطق ، الدهبي تحفه ، تحفه ، تنظر لها السيده العجوز ، تحفه خاااااااالص وتضحك ، تنادي عامله المانكيير ، يالا يابنتي تعالي اعملي حواجبي لحسن الراجل مجنون مجنون خالص ، وتضحك ، لو اتاخرت اكتر من كده حنيزل يكسر المحل ، وتضحك ، تناولها الست التخينه سيجاره ، تحيه ياحاجه ، نفسين مع بعضينا ، تاخد السيجاره ، ياه ده انا مبطلاها من زماااان قوي لكن والله ماانا كاسفاكي ، ينظر لها صاحب المحل نظره خبيثه ، مبطلاها ايه يامدام ، ضحكت السيده العجوز ، ايوه مبطله شراها يعني عادي سيجاره من هنا وسيجاره من هنا عادي ، وتضحك ، يضحك صاحب المحل ، تلومه السيده التخينه ، تصدق انت بايخ ماتسيبها براحتها تقول اللي نفسها فيه ، دي رجل جوه ورجل بره سيبها براحتها ، ينفجر صاحب المحل في الضحك ، مين دي اللي رجلها بره ،دي مسمار ، دي تدفنا كلنا وتفضل تضحك ، تسمعه السيده العجوز ، بتقول حاجه يامسيو ، عارف انا عيلتي كلها بتضحك ، جوزي مجنون وعيلته كلها مجانين ، وتضحك وتضحك ، اصل الضحك بيطول العمر يامسيو ، ينظر للسيده التخينه ويهمس ، ماقلتش حاجه انا بقي ، تضحك السيده التخينه وتسالها ، تخدي سوجاره كمان ، تشكرها لا شكرا ثم تكمل كلامها ، كمان شويه وتنفجر في الضحك !!!!

مازالت الست ام عينين حمرا بتعيط ، تصمت قليلا ثم تنفجر في العياط ، يرن تليفونها لاترد عليه ، تعيط ثانيه ، تسال الست العجوز صاحب المحل مالها ، يغمز بعينه وشفتيه ، عادي عادي ماتركزيش معاها ،نفسها تعيط حبه ، تلح عليه ، ايوه يعني مالها ، يغمز بعينه ، شويه مشاكل وعادي حتخلص عياط وخلصنا ، تقترب منها الست العجوز تناولها منديل ، تاخذه منها وتشكرها ، عيطي حبه وخلصي بقي ، عينيك احمرت خالص ، لاترد عليها وتعيط اكتر واكتر ، تعود السيده العجوز لمقعدها ، ياحرام دي حتموت روحها من العياط ، تصرخ الست التخينه ، روقي ياشابه روقي ، تهلكي صحتك وعينيك علي ايه ، مافيش حاجه تستاهل ، يشخط فيهم صاحب المحل ، لو سمحتم كل واحده تخليها في حالها ، ضحكت الست العجوزه ساخره ، خلاص عيطي ياحبيبتي براحتك !!!

تساله الام اللي معاها طفل ، امتي دور الولد ، يتافف ، لسه بدري ، حاخلص الانسه وبعدين الهانم وبعدين ابنك ، ياه صعب قوي ااقعده مؤدب كتير كده ،ضحكت السيده العجوز ، سيبه براحته قليل الادب ، تتوتر الام اللي معاها طفل ، مش قصدي انا ابني مؤدب بس التكتيفه صعبه ، تناديه السيده العجوز ، تاخد لبانه وتضحك ، تخرج من حقيبتها قلم ملون ،ادي له ورقه يامسيو يرسم يسلي نفسه ، تشكرها الام ، بس بلاش لبان لحسن بيمسك في شعره ، تضحك العجوز ماهو جاي يحلق مافيش مشكله ، تضحك الست التخينه ، يغني عبد الحليم ، سواح وماشي في البلاد سواح ، توافقه الست التخينه ، ياحول الله ده تلاقيه تعب قوي ،يسالها صاحب المحل هو مين ،تضحك الست التخينه عبحليم انت مش سامعه يامسيوووووو ، تنفجر الست العجوزه في الضحك ، تصرخ الام في ابنها ، نو ، كده نو ، عيب خالص ، نوتي بوي ، ينتبه صاحب المحل ، يجده رسم علي الحائط ، ينظر لامه غاضبا ، كده برضه يامدام ، تخطف القلم من ايد ابنها ، سوري يعني هو انا اللي اديته القلم ، تضحك السيده العجوز ، هو جري ايه ، شويه شخابيط علي الحيطه ليفه بشويه صابون توديهم خالص ، بالراحه علي اعصابكم ،مالكم ، هي الناس كلها بقت مجنونه زي جوزي ولا ايه ، وتضحك ، يسود الصمت ثانيه ثم ينفجر الجميع في الضحك وهي معهم ، تمسك الام بايد ابنها وتضربه عليها ضربتين تلاته ، انت تقعد جنبي ماتقومش خالص !!!

تنظر الست التخينه في المرايه سعيده فرحه ، اهو شفت الدهبي تحفه ازاي ، ماقالش لا يعني ، يبتسم صاحب المحل ، تسلم ايدك والله ، تلم اشياءها وتتحرك صوب الباب ، ثم تعود له ، كنت حانسي ، حسابك كام ، يحاسبها ، تشكره ، سلامو عليكم ، تكاد تخرج من المحل ثم تعود له مسرعه ، ده دهبي دهبي صح ؟؟ يهز راسه ، طبعا ، تسلم ايديك كده بقي بقيت الخالق الناطق جولياروبرتز ، سلاموا عليكم ، تنفجر الست العجوزه في الضحك، تبتسم الام اللي معاها طفل ، ترفع الست اللي بتعيط وجهها تنظر للسيده التخينه شعرها قصير ذهبي لامع ملابسها بلدي ، تنظر لها وتنفجر في الضحك بشكل هسيتري ، تصقف الست العجوزه فرحه ، ايوه كده اضحكي حبه الضحك بيطول العمر ، انت ماسمعتيش ليلي مراد وهي بتقول اضحك كركر اوعي تفكر ،وتضحك وتضحك !!!

تستأذنها الام ، ممكن يقص شعر الولد قبل حضرتك ، توافقها ، طبعا ، قص مسيو للولد شعره ، انا لسه قاعده ، ماورايش حاجه ، انا اصلي هربانه من جوزي المجنون ، قلت له اسيبك شويه تتجنن براحتك علي مااعمل شعري ، وتضحك !!! يجلس الولد علي الكرسي تمسكه امه ، يشخط فيه صاحب المحل ، بقولك ايه ، ولا حركه سامع ولا حركه ، ينفجر الطفل وقت يري المقص يقترب من راسه ، يصرخ ، يبكي ، يمسك في امه ، تحاول تهدئته ، تشخط فيه ، لايصمت ، يتوتر صاحب المحل ، انا قلت لحضرتك ، اخر مره بهدلني وكان حيتعور ، تنهره الام ، نوتي بوي ، لايصمت ، يبكي ويبكي ، يجلس صاحب المحل يشرب سيجاره ، يخرب بيت عيونك ياعليا شو حلوين ، تغني فيروز ، تضحك السيده العجوز ، تبكي الست ام عنين حمرا ، يخرج صاحب المحل من الباب ، حاشم شويه هوا !!!

لايكف الطفل عن البكاء ، لاتتوقف السيده ام عينين حمرا عن العياط ، لاتكف الست العجوز عن الضحك ، تحكي للعامله بتاع المانكير ، جوزي اصل عنده سلاح مرخص امبارح كان حيموت الواد بتاع السوبر ماركت ، ال ليه وليه يضرب الجرس بصوت عالي ، الواد اتخض لما لقاه بيفتح الباب وعينيه بتطق شرار ، قعد يحقق معاه تقوليش كان متهم عند في الحجز ، تشرح للعامله ، اصله كان لوا وبقي علي المعاش ومن ساعتها وهو اتجنن ، كل شويه يزعق يزعق وانا اضحك ، وتضحك وتضحك !!!

لايكف الطفل عن البكاء ، تاخده امه وتخرج من المحل ، تجد صاحب المحل واقف امام الباب ، باي انا حامشي بقي اصله مافيش فايده فيه مش راضي يبطل عياط ، يودعها صاحب المحل بابتسامه وصمت ، تخرج بعد قليل الست اللي عينيها حمرا ، تري صاحب المحل قدام الباب ، تبتسم له ، شكرا جدا ، يسالها ، مش حتعملي حاجه ، تضحك ، لا طبعا ، كنت حافطس نفسي اعيط ، مالقيتش حته اعيط فيها براحتي غير هنا ، جوزي للمره الالف اضبطه بيعاكس الشغاله ، لو طردت الشغاله انا اللي حاحتاس ، دمه بارد ، قلت له بطل تعاكس الشغاله قالي انا برفع معنوياتها علشان تعرف تشتغل لك كويس ، ضحك صاحب المحل ، بتضحك ؟؟ صمت خجلا ، ماهو كلام مالوش حل غير الضحك ، جوزك رجل طيب بس انت عارفه طبعه ، طيب اه لكن انا باقرف قوي لما يعاكس الشغالين ، ياريته بيعاكس حاجه عدله ، ضحك صاحب المحل ،المهم انك بقيت احسن ، اه بقيت احسن وحاروح اطرد الشغاله وان شالله البيت مانضف ، باي !!!!

دخل صاحب المحل للمحل ، وجد السيده العجوز مازالت تضحك ، تحكي للعامله ، الراجل اللي بينضف السلم كان حيموت من الرعب ، ليه وليه خبط الباب وهو بيكنس السلم خرج وراه بالطبنجه الا يموته ، وانا وقفت علي الباب اصرخ واضحك ، سال السيده العجوز ، حتعملي شعرك ، نظرت في ساعتها ، لا خلاص بقي اروح انام لحسن تعبانه شويه ، دفعت حساب المانكير وخرجت ، اوضححت له قبل خروجها ، بكره حاجي اعمل شعري !!!

انتهي اليوم ، اطفي الانوار وجلس صاحب المحل منهكا يسمع الراديو ، انت عمري اللي ابتدي بنورك صباحك ، سالته العامله ، هو جوز المدام فعلا مجنون ، نظر لها وانفجر في الضحك، كلهم مجانين الحقيقه ، بقولك ايه البس هدومك انت يالا واتكلي علي الله ، وبقي مكانه يضحك ، كلهم مجانين كلهم مجانين ........... !!!