مدونة "حكي وحواديت" للكاتبة والروائية أميرة بهي الدين



الاثنين، 5 سبتمبر 2011

مجرد اعلان صغير !!!!



كل صباح..
أفتح الصنبور في إرهاق
مغتسلا في مائه الرقراق
فيسقط الماء على يدي.. دما!
وعندما..
أجلس للطعام.. مرغما:
أبصر في دوائر الأطباق
جماجما..
جماجما..
مفغورة الأفواه والأحداق!!
امل دنقل
فقرات من كتاب الموتي

( 1 )
جمهوريه شارع الميتين !!!

دون صخب ... اعلنت الجمهورية استقلالها عن الجسم المستبد القاهر عن الشوارع اللي مالهاش اصحاب!!!
قال عبد الفتاح المنجد لمرتضي الحلاق ، اشمعني احنا حنقعد مربوطين في الكرسي زي المكسحين ، لازم نمشي ونستقل ، ماجتش علينا!!!
مرتضي عجبته الفكره وشاف روحه نوبة واحده من حلاق لرئيس جمهوريه ، قال والله وباضت لك في القفص ياابو نسمه ، مرتضي الحلاق بقي رئيس جمهوريه ياشعب ، طلع فوق سطوح بيتهم وربط فانلته المقطوعه بعد ماضربها فرشه بويه الوان فحلقي ربطها في عصايه الغليه اللي امه كانت بتضربه بيها وبطلت لما صحتها راحت ، ربط الفانله المقطوعه في عصايه الغليه واعلن استقلال جمهورية شارع الميتين عن البلد اللي كانت كبيرة وعن الشوارع اللي مالهاش اصحاب !!!
لما اعلنت جمهوريه شارع الميتين استقلالها ورفرف علمها في السما ، عبد الفتاح المنجد خد الكرسين المكسرين اللي ابوه كان راميهم في المخزن وقفل بيهم اول الشارع ، وفي اخر الشارع وقف الواد الاعرج سنوفه جنب كشك البيبسي وقال له ونبه عليه دي اخر حدودنا ، حسك عينك حد يعدي ولا اكسر لك رجلك التانيه وتبقي مكسح ، حسك عينك حد يعدي الا لما تاخد منه الجمارك والضرايب واللذي منه ... 
سنوفه الاعرج مش فاهم اوي لكن عاجباه اللعبه ، بقي حارس الحدود وعمال يشرب بيبسي ببلاش ، مسك عصايه المقشه وقلع فانلته وربطها فيه وهش الكلاب المسعوره وهدد العيال البلطحيه بتوع شارع ابو رقبه مكسوره ان اللي حيعدي عندهم من غير جمارك واللذي منه حيقطع خبره .. 
الواد البلطجي اللي ماسك جمهوريه شارع ابو رقبه مكسوره ، ساله ، وايه اللذي منه ياسنوفه ؟؟ منكم نستفيد ، قاله شندوتش بريزه قزازه بيبسي علي حسابكم وبسرعه ، الجمهوريتين ، جمهوريه شارع الميتين وجمهوريه شارع ابو رقبه مكسوره عملوا اتفاقيه سلام وبقوا بيتبادلوا الشندوتشات والبيبسي !!! ا
وقعد مرتضي علي الكرسي المكسور فوق السطوح فرحان وسعيد ، اخيرا اتحقق حلم حياته وبقي رئيس جمهوريه شارع المييتين !!!
طيب وعبد الفتاح ، لا عبد الفتاح قال دعونا نعمل في صمت مابحبش المراكز والمناصب وجلس بجوار سنوفه يقسم معاه اللذي منه !!!
( 2 )
جمهوريه لولو للانبساط الدولي

شفت بعيني محدش قالي ، طنط لوسي اتصللت بانكل مهاب من تليفونها المحمول وعماله تصوت ، كلمه عربي وكلمه انجليزي وكلمه فرنساوي ، والله اعلم كان شكلها بتشتمه ، كانت محموقه قوي وعروقها حتفرقع ، حتفضل قاعد كده زي خيبتها ، ولا هامك الناس بيقولوا علي ايه ، يعني ايه مايفرقش ، طبعا يفرق، الستات عند الكوافير علي الحدود الدوليه بين كل الجمهوريات عمالين يتكلموا ، كل واحده جوزها اعلن استقلال جمهوريته وانا قاعده مخروسه مش لاقيه حاجه اقولها !!! 
طبعا ماكنتش سامعه انكل مهاب بيقول ايه ، لكن طنط لوسي كانت متنرفزه قوي قوي ، يعني ايه مايفرقش معاك وبرستيجي طيب ، انا حاروح عند بابا في جمهوريه بيتش شجر الموز لغايه ماتسترجل وتتصرف ، اه تسترجل ، ماهو الرجاله النهارده سوري يعني اتصرفوا وخلاص ، وانت قاعد تقرا الجرايد وتعيط وتقول البلد ضاعت ، ماتضيع ولا تروح في ستين داهيه ، المهم احنا ومصالحنا وشكلها وبرستيجي قدام الستات في الكوافير !!!!
قفلت طنط لوسي السكه بعصبيه شديده ونادت علي كل الشغالات الفليبنيات عندها ، لموا الهدوم والجزم والبرانيط واوعو تنسوا الصيغه ، يالا حنقفل البيت المخروب ده ونروح عند بابا في جمهوريته "" جمهوريه بيتش شجر الموز "" ..
جريوا الشغالات الفليبينات بسرعه يلموا الهدوم ويلفوا البرانيط ويحطوا قزاز البرفان في العلب الكارتون ، و.............. ركبت طنط لوسي عربيتها وشاورت للسواق النوبي ، تاخد البنات معاك وعلي جمهوريه بابا عارفها بيش شجر الموز ، هز السواق راسه ايوه فاهم وبسرعه تحرك الموكب !!!
خرجت العربيات من الشوارع اللي مالهاش صاحب ، الشوارع اللي لسه تبع البلد المخروبه ، الزباله في كل حته وعساكر البوليس واقفين زي خياله المأته والتلفزيون في الشوارع لسه بيذيع ان كل حاجه تمام والبلد ميت فل وعشره ، خرج الموكب من الشوارع ده وقرب من حدود جمهوريه بيش شجر الموز ، كان مصطفي البواب واقف قدام البوابه ولابس بدله كحلي وكاسكيته رياضيه ، ماسك مضرب اسكواش قديم بيهش بيه الناس الفضوليه اللي بتقرب من البوابه ، زمر السواق النوبي بعصبيه ، قرب منه مصطفي البواب بعصبيه اكتر ، ايه يااخينا ماتحترم نفسك ، بتعمل ازعاج ليه للسيد رئيس الجمهوريه واهله ، خرجت لوسي راسها من الشباك ، افتح يامصطفي بلاش دوشه ، ارتبك مصطفي عيني ياهانم العتب علي النظر ، اصل الناس الغجر بتوع الشوارع اللي مالهاش صاحب بيرموا جتتهم علينا ، كل شويه اكتف منهم حبه وانزل فيهم ضرب ، الباشا يؤمرني اسيبهم بعد مااعلمهم الادب ، فتح البوابه ، دخل موكب العربيات ، اول مالعربيات دخلت من البوابه ، جري مصطفي وعلق الاعلام الصغيره بتاعت جمهوريه بيش شجر الموز علي اريل العربيات ، اعلام ملونه بترفرف مرسوم عليها شجره موز وابتسامه كبيره ، ابتسم من فضلك ، انت في امان ، انت معنا محمي ومبسوط ، جمهوريتنا مافيش بعد كده ، شارع التاني التالت والموكب ماشي ، لوسي بتكلم نفسها ، ادي الرجاله مش يقولي مش فارق ، اهو بابي اهو حافظ علي برستيجه ووضعنا ، جمهوريه محندقه صحيح لكن بديعه زرع وشجر وورد ونوافير ووز ابيض في الشوارع بدل الزباله والقرف في الشوارع اللي مالهاش صاحب..
اول مادخلت البيت رمت نفسها في حضن باباها وهاتك ياعياط ، يابابي ولا فارق معاه منظري عند الكوافير ، ااقوله كل واحده جوزها رئيس جمهوريه يقولي بلاش كلام فاضي وطول الوقت قاعد يعيط ، ضحك باباها رئيس جمهوريه بيش شجر الموز ، يالوسي ياحبيبتي جوزك طيب بس ماعندوش طموح وانت عارفه كده من يوم مااتجوزتيه ، فاكره وقتها قلتي ايه ، قلتي احسن ان ماعندوش طموح علشان اعرف اسيطر عليه ، نسيتي ولا ايه ، ارتبكت وهي تبكي ، بس يابابي مش للدرجه دي ، ماعندوش طموح ازاي ، كل واحد من صحابه ومعارفه حتي اللي بيشتغلوا عنده بقي رئيس جمهوريه الا هو ، يرضيكي كده يابابي !!!
نادي الاب علي مروان ، اسمع ياابني ، افتح الخريطه وشوف كده ايه اللي فاضل ينفع يستقل تاني ، اي شارعين حط ايدك عليهم ، وارفع علم جمهوريه جمهوريه ، سالها ، تحبي نسميها ايه يالوسي ؟؟ ضحكت ، اي اسم المهم تكون جمهوريه مستقله ، قالك خلاص سميها جمهوريه لولو للانبساط الدولي ، ضحكت لوسي ، مرسي يابابي ، شرح الاب لمروان ، اي شارعين تلاته وياريت يكون بيطلوا علي ميدان ولا حاجه ، ابعت رجالتك ينضفوهم من الزباله ويطردوا البوليس ويشيلوا الاعلام المهلهله الوسخه المحطوطه دي ، ينضفوا الشوارع ويرفعوا اعلام جمهوريه لولو للانبساط الدولي ..
ساله مروان وشكلها ايه الاعلام ؟؟ ضحك الاب وقاله اي شكل ، خش علي الفوتوشوب ارسم علم ، صرخت لوسي ، يابابي عايزاه فوشيا وعليه نجوم بتلمع ، قاله اهو لوسي حلت لك المشكله ، اعمل الاعلام وخد الرجاله ، وساعتين وتقولي كله تمام ، سالت لوسي بارتباك ؟؟ طيب لو حد اتعرض لهم يابابي ، ضحك الاب ساخرا ، مين ده اللي يتعرض لمين ، دي شوارع مالهاش اصحاب يابنتي ومابيصدقوا تستقل وتشيل هم نفسها بنفسها ، ماتشغليش بالك انت !!!
وقعدت لوسي تشرب سجاير وتتفرج علي ال"تي في" ولما تليفونها يرن وتلاقي رقم جوزها طبعا ما تردش عليه ، ساعتين تلاته اربعه وهي في منتهي التوتر وفجأ دخل مروان مبتسما يلوح بالعلم ، اتفضلي ياهانم شوفي بنفسك ، امسكت العلم الفوشيا بالنجم اللي بتلمع واخذت تلوح به سعيده ، وركبت العربيه وقالت للسائق النوبي ، اطلع يااسطي علي جمهوريتنا ، جمهوريه لولو للانبساط الدولي وطلبت جوزها مبتسمه ، مبروك ياحبيبي ، بقيت رئيس جمهوريه ، اه والله بابي حل المشكله وبسرعه ، جمهوريه ايه ، اه نسيت اقولك ، جمهوريه لولو للانبساط الدولي ، صمتت لوسي غاضبه من زوجها ، بتضحك علي ايه ، اه هي اسمها كده ، والله اسم جميله وموسيقي كمان ، حاستناك في قصر الرياسه ماتتأخرش ، اغلقت الخط سعيده ، غدا او بعد غد ستذهب للكوافير علي الحدود الدوليه وتقدم نفسها لكل الموجودين باعتبارها السيده الاولي لجمهوريه لولو للانبساط الدولي و............. فتح احد الرجال التابعين لابيها البوابه الكبيره وشرح لها ، جمهوريتك ترد الروح ياهانم شارعين كبار وميدان وكله قريب من البحر ، العمارات عاليه تشوفي البحر والغروب و........... ارسلت له لوسي قبله في الهواء ولوحت بالعلم وخطت خطوتها الاولي في جمهوريتها جمهوريه لولو للانبساط الدولي !!!!
وسرعان مااعلنت جمهوريه لولو للانبساط الدولي استقلالها عن الشوارع اللي مالهاش صاحب واصحبت لوسي السيده الاولي للجمهوريه !!! وكانت هذه هي الجمهوريه التلاته خمسين داخل حدود مارينا سابقا التي كانت جزء من البلد الكبيره سابقا الشوارع اللي مالهاش صاحب حاليا !!!! وفوق سطح الفيلا التي تعيش فيها لوسي ، يرفرف علم كبير فوشيا بنجوم ذهبيه ساطعه!!!!

( 3 )
جمهوريه كفر الرجاله وجمهوريه رجاله الكفر

انه منظر مخيف جداااااااااااااااااااا
مئات الرجال يقفون بالاسلحه الناريه والبنادق صفين امام بعضهما !!!!
عندما همت الشمس بالرحيل صرخت احدي السيدات من فوق سطح دارها !!! الطف يارب !!!
انها بهانه زوجه الغفير النظامي مصطفي الحيلة !!!
مثل سيدات كثيرات يجلسن فوق اسطح الدور الطينينه يختبئين خلف اعواد الحطب الناشف يتابعن المعركه المرتقبه !!!
مصطفي الحيله ينام فوق الفرن في الدار يرتعش من الحمي !!! فالليالي الطويله التي قضاها واقفا في الظلام يصرخ في المتحاربين يتفقوا بالادب ولسعه برد الفجر التي تتسلل كالمناشير لعضه هدت حيله ، ترك البندقيه وتسلل فوق الفرن ونام ، صرخت فيه بهانه ، حتنام وتسيبها تولع ، يرتعش من الحمي واسنانه ترتطم ببعضها ، هو اني يعني اللي حافلح اطفيها ، خليك في حالك يامره واللي رايده صاحب الخيمه الزرقا يكون ، لكن بهانه لا تطيعه وتتسلل فوق السطح ، خلف اعواد الحطب الناشف تجلس تراقب المعركه التي ستندلع وتخرب الدنيا زياده ماهي خربانه !!!!
لو كنت تجلس بجوار بهانه علي السطح ، لشاهدت منظر مرعب ، صفين من الرجال بالجلاليب الزرقاء والسوداء والعمم البيضاء الكبيرة والاشناب التي يقف عليها الصقر ، صفين من الرجال ، ربما الف ربما عشره الاف لااحد يعرف بالضبط عددهم ، صفين متقابلين بينهما خط مرسومه علي الارض بزعزوعه قصب ناشفه ، الصفين واقفين متربصين ببعضهما البعض منذ عشره ايام وربما خمسه عشر يوما !!! كل صف ينتظر من الصف الاخر خطأ حتي يضرب نار وتبدأ المعركه ، لكن كل الرجال يقظه ولا تخطيء والمعركه الكبري التي بدأت بالسباب والشتائم واعمال الصغار لم تكتمل ولم يبدأ ضرب النار بعد !!!
والقصه بدأت عندما قرر الشيخ رحمان عبد الواسع عمده قريه "كفر الرجاله " ان يستقل بالكفر معلنا تأسيس جمهوريه كفر الرجاله ، الشيخ رحمان عرض الفكره علي كبارات العائله فوافقوه ، بل وتجرأ احد الشبان النزقين ولامه لانه تأخر في اعلان استقلال الجمهوريه وان الناس كانت قربت تتمألس عليهم في سوق الجمعه لان كفر الرجاله كله نسوان قليله الحيله قاعده كافيه خيرها شرها وتبع الشوارع اللي مالهاش حد ، الشيخ رحمان ، قام من مكانه وضرب الواد قليل الادب بالكف وزأر بصوته المخيف ان كفر الرجاله براغيتها رجاله واللي فيه المصلحه حيتعمل ولما الكبار يتكلموا الصغار يخفوا !!!!
اعلن الشيخ رحمان عبد الواسع انه سيعلن استقلال جمهوريه كفر الرجاله عن الشوارع اللي مالهاش اصحاب ، رجال عائلته وتابعيه ضربوا نار احتفالا وزغردت النسوه ووزعوا شربات ، اخد الشيخ رحمان عمه ابيه عين اعيان الكفر وكبيرهم ورفعها فوق " بندجة " وقال ده العلم بتاعنا ورمزنا وعزنا ، وبسرعه رفع الرجاله " عممهم " فوق البنادق واصبح الاستقلال وشيكا!!!
لكن الامور لاتسير بسهوله ، لابد ان تحدث مشاكل حتي يذكر في كتب التاريخ قدر الصعوبات التي واجهها المصريين وهم يؤسسوا جمهورياتهم المستقله ، اذ ليس معقولا ان تستقل الجمهوريات بسهوله وكأن سكين بارد مر في قالب زبده فقصمه نصفين ، لابد من صعوبات ، والصعوبات بدأت في جمهوريه كفر الرجاله المستقله وقتما علم النائب السابق للمركز فتوح بيه ان الشيخ رحمان عبد الواسع سيستقل ويكون جمهوريه كفر الرجاله ، النائب اعترض طبعا علي ذلك الاستقلال ، وقال لكل معارفه ، احنا لينا فيها زي ماليه فيها واكتر ، ان كان هما ليهم العموديه احنا لينا كرسي النيابه والاصل والجاه ، ولاد الحلال وصلوا الكلمه للشيخ رحمان وعائلته ان النائب السابق سبهم وقال ان عائلته وليس عائله الشيخ رحمان وحدها صاحبه الاصل والجاه ، الشيخ رحمان برم شنبه وضرب البندقيه بكعبها الجامد علي الارض وقال مش كفايه كنا بنساعدهم في التزوير حيجوا النهارده ويعملوا رجاله علينا ، ولاد الحلال برضه خدوا الكلمتين بتوع الشيخ رحمان وذهبوا للنائب السابق فتوح بيه وقالوا له ان الشيخ رحمان اعلن بعد صلاه العصر ان كفر الرجاله بتاعتهم لانهم هما الرجاله اما عيله النائب فدي ممكن تعمل جمهوريه كفر النسوان و.................... وخرج الالي المدفون في القصب واتعمرت البنادق واتنصب الرجاله علي الحارات الضيقه والنواصي و.... لما نشوف بقي مين الرجاله !!!!
الحرب قامت في الكفر الصغير اللي محدش يعرف اسمه ولا عمره بان علي اي خريطه ، النائب السابق فتوح بيه جمع عائلته وحذرهم من التهاون مع عائله العمده اللي عايزه تركبنا ، الشباب ثاروا وقالوا لاعاش ولا كان وكفر الرجاله طول عمره صناديقه بتاعتنا وحتفضل بتاعتنا ، الشيخ رحمان عبد الواسع جمع رجال العائله وتوعدهم ، حاحلق شنبي واسيب الناس كلها تعايركم لو مره من نسوان فتوح بيه داست علي شبر من ارض كفر الرجاله ، ساعتها حاحلق شنبي واسميه كفر النسوان واسيب فتوح بيه بخدوده الحمرا وصوته الناعم يحكمكم !!!!
ووقف الرجال صفين ، اشناب وبنادق وعمم !!!
حرب كلاميه بدأت بنزق الشباب وانفعالاتهم ، انتم صدقتم روحكم ، ده احنا اللي زورنا عشانكم لما كنا ايد واحده ، يا حرامية يانور ياصيع ياللي كنت بتاخدوا فلوس من الناس علشان تشغلوا عيالهم وتسرقوهم ، عائله الشيخ رحمان ورجالته والمطاريد اللي نزلوا من الجبل يقفوا معاه بعد ماوعدهم بالعفو والصلح والعيشه الطريه ، كلهم وقفوا يردحوا لرجال عائله فتوح بيه ، هما يشتموا والنسوان ترمي ميه وسخه من فوق الاسطح والحمير تنهق !!!!
رجاله فتوح بيه وعائلته وموظفين المركز اللي وعدهم فتوح بيه يكونوا وزرا في جمهوريته ، وقفوا علي الصف التاني يلقحوا كلام علي الشيخ رحمان والعموديه ، ياعموديه ورق ، ياعمده علي كفر البهايم ، ياللي ماكنش ليكم حس قبل مانعمل ليكم حس ، زورتوا صناديق ايه ماانتم قبضتم تمن التزوير ، ياللي كرشكم واسع وذمتكم اسكت ، زغرطي ياوليه انت وهي ، نساء عائله فتوح بيه تزغرط وتصقف وتتحزم بالطرح السوده وتردح وترقص زي الندابات في المياتم القديمه ...
جمهوريه كفر الرجاله من حدنا ومن نصيبنا !!!
جمهوريه كفر الرجاله مش حتكون لغيرنا واللي يعرف ابويا يقوله !!!
ووقف الرجال يوم واتنين ، اسبوع واتنين ...
رجليهم اتكسرت ودراعتهم خدلت ورقبتهم وقعت فوق صدورهم ، والكل مستني غلطه !!!
غلطه واحده حتحسم المعركه ، حد يغلط فالرصاص يلعلع في الهوا وناس تموت وناس تعيش واللي يكسب تبقي جمهوريه كفر الرجاله من حده ومن نصيبه !!!!
مصطفي الحيله وقع من كتر التعب ومعاه غفر كتير ، قرروا ينسحبوا من الخناقه ، اللي يكسب هما معاه ، ماهي دلوقتي الدنيا هايصه ومالهاش كبير ، مصطفي الحيله جات له حمي ودخل نام فوق الفرن ، بهانه اختبئت خلف اعواد الحطب الناشف تراقب المعركه وكيف ستحسم ولصالح من ، نتيجه المعركه حتحسم هي حتخدم في بيت الكبيره ام رحمان ولا بيت الهانم مرات فتوح بيه ، جوزها حيقف غفير فين وهي حتخدم في انهي بيت وتحمي الفرن فين !!!!
صفين الرجال بينهم خط مرسوم علي تراب الطريق ، اللي حيعدي الخط ده يعتدي علي الطرف التاني !!!
الشيخ رحمان قاعد علي كرسي كبير يبرم في شنبه وكل شويه يضرب طلقتين تلاته في الهوا ، احنا هنا !!!
فتوح بيه قاعد علي فوتيه شاله واحد من رجالته وجابه له من مقره الانتخابي وقاعد يتكلم في المحمول ويبص للفلاحين حوله وبجواره ويضحك ضحكات متلاحقه مستفزه وكأنه يقول لهم انا اللي كسبان !!!ا
دخل الليل فارتفعت همهمات النساء من فوق الاسطح في الظلام يارب تستر !!!
الشيخ رحمان قال الليله دي مافيهاش قمر وهي اللي حتحسم المعركه !!!
فتوح بيه قال الليله دي سوده عليهم وكفر الرجاله وجمهوريته المستقله من نصيبي !!!
ونام المطاريد والرجال وموظفين الوحده المحليه ومصطفي الحيله وكل النسوان !!!
وبقي الشيخ رحمان عبد الواسع وفتوح بيه صاحيين !!!
فجأ همس فتوح بيه ، كده ياشيخ رحمان توقف رجالتك في وشي واحنا مالناش غير بعض !!!
همس رحمان ، ياباشا احنا محاسيبك انت الي قسيت علينا وهددتنا !!!
ضحك فتوح ، ياراجل ياناقص ، ده كرشك ده من فلوسي انت ناسي الصناديق اللي كنت بتقفلها لحسابي ، انت راجلي وحبيبي!!!
ضحك رحمان ، ياباشا انت كل العز اللي انت فيه من شقايا وشقي رجالتي ، مش احنا اللي سودنا الصناديق وحبسنا خصومك في الزريبه وخوفنا الحكومه ورجالتها ونجحناك !!!
اشعل فتوح سيجاره الفاخر ، وبعدها واخرتها ياشيخ رحمان ؟؟
برم رحمان شنبه ، اللي تحكم بيه ياباشا بس من غير ماتقل هيبتنا وسط الخلايق !!
اقتربوا وتهامسوا وانفجروا في الضحك فرحين سعداء..
استيقظ الرجال والمطاريد وموظفين الوحده المحليه ورجال العائلتين ، وجدا الشيخ رحمان وفتوح بيه بياكلوا قشطه وعسل من طبق واحد ، سالوهم خير ، ضحكوا وقالوا خير طبعا !!!
ضرب الشيخ رحمان ميت ميتين طلقه في الهوا ، واعلن علي كل الرجاله ، قررنا نحن رحمان عبد الواسع رئيس جمهوريه كفر الرجاله وفتوح بيه رئيس جمهوريه رجاله الكفر ، اننا نقسم الكفر نصين وكل نفر ياخد نصيبه برجالته ببهايمه بنسوانه وتحيا الجمهوريات المتحده بتاعت كفر الرجاله ورجاله الكفر !!!!
زغردت كل النسوان واتضرب نار كتير كتير ورفعت اعلام الجمهوريتين ، عمه فوق البندقيه وبندقيه فوق العمه !!!
استيقظ مصطفي الحيله وسال بهانه خير ، قالت له خير ياخويا ، سلامه في خير وخير في سلامه ، لبس جلابيته وجري يدور له علي مكان ووظيفه عن حد فيهم !!
لبست بهانه الملس الاسود وكحلت عينيها بالمرود وزينت صدرها بالكردان ونزلت الشارع ، فاتت علي بيت الكبيره ام الشيخ رحمان وقالت له الف بركه سبع بركات ، ضحكت ام رحمان وناولتها الحلاوه وقالت لها ماتغيبيش يابت علي ، خبطت بهانه علي صدرها وقالت لاممكن استغني عنك ، الجمهوريات دي للرجاله يسلوا نفسهم بيها لكن احنا ياكبيره زي مااحنا ، مرت علي بيت الهانم حرم فتوح بيه وزغرطت وقالت لها قلبي انشرح ياست الستات ، ضحكت الهانم ونفحتها جلابيه جديده وطرحه وسجاده صلاه من اللي كان جوزها بيوزعها وقت الدعايه الانتخابيه وقالت لها ، مهما يحصل يابهانه احنا مالناش دعوه بالسياسيه ، ضحكت بهانه ووافقتها ، طبعا ياهانم مالنا احنا ومال المخفيه السياسه ، الرك علي الحب في القلب ياست الستات
و........................... رفرفت اعلام الجمهوريات المستقله فوق البلده الصغيره التي انقسمت جمهوريتين مستقلتين عن الشوارع اللي مالهاش اصحاب !!! جمهوريه كفر الرجاله وجمهوريه رجاله الكفر والشيخ رحمن وفتوح بيه ايد واحده !!!!

( 4 )
جمهوريه الحنان كله

اقسمت كريمه البلانة بمقاصيصها انها حتعلن استقلال الجمهوريه اللي ساكنه فيها ، امسكت مقاصيصها المصبوغه بالحنا وجمعت حولها البنات وقالت لهم ، وحياه مقاصيصي الغاليه وحياه شقايا العمر كله لابقي رئيسه جمهوريه ، هي جت علي يعني ، مين البئف اللي قال النسوان ماتنفعش تبقي رؤساء جمهوريه ، مين الواحد ده ، السباك اللي بيشم ولا الشيخ اللي بيجوز العيال الصغيره ويضرب ورق تسنين ولا الافندي العوجر اللي بيشحت هدومه علشان يتقمع بيها ويروح الشغل !!! مش انا ست اهو وبلانه كمان ، لكن ولا تستعصي علي ، انا ارجل من ميت راجل ، وكلها يومين تلاته ارتب نفسي وارفع العلم !!! ضحكوا البنات فرحات ، وماله ياخالتي يبقي لينا جمهوريه وعلم زي كل الناس والا هي حتيجي عندنا وتعطل !!! سالتها ام عباس الماشطه ، وجمهوريتنا ياخالتي نسوان بس ، خبطت كريمه علي صدرها وصرخت ، تفي من بقك يابت ، لا طبعا رجاله ونسوان ، اوعي تصدقي يابت ان الرجاله حتعمل فيها وحوش ويقولوا ماتحكمناش ست ، ابدا وحياتك ، كلهم حيقبلوا ، اللي حيعمل فيها دكر شويه وينخ ، اصل حكم النسوان راحه ، الرجاله تأنتخ في البيوت والنسوان تشقي عليهم عادي يعني ، حيجي لهم عين منين بقي يقولوا احنا اللي نحكم ، الراجل اللي مابيحكمش بيته وبيصرف علي مراته وعياله ويكفيهم ماينفعش يبقي رئيس جمهوريه ، اذا كان مش رئيس جمهوريه نفسه حيبقي رئيس جمهوريتنا ازاي ، ماتعتليش هم !!!
وبدأت كريمه البلان خطواتها لتنفيذ مخططها العبقري ، جمهوريه الحنان كله ، نادت كريمه علي الواد لمونه وسالته ، مازهقتش من الشقاوه ياعسل ، ضحك وقال زهقت ، قالت له تبقي دراعي اليمين بالادب والحق في جمهوريه الحنان كله !!! ضحك لمونه وقالها لها وهو ينظر علي الشق بين نهديها البارزين من الجلابيه الشفافه ، اموت في الحنان ياريسه وانا تبعك ومحسوبك !!! ضحكت وناولته بريزه وباكيته بانجو وسالته ، ليك كلمه علي بقيه المقاطيع والا ادور علي حد معاهم يسيطر عليهم ، ضحك وقال لها ، الحي الشعبي بتاعنا ده ولا مؤاخذه من يوم ماربنا خلقه بيرجف مني وضربه مطوتي معلمه علي وشوش كتير واللي مايجيش بالادب يجيي بالمطوه ، ضحكت ضحكات متتاليه ، براوه عليك يالمونه راجل من ضهر راجل ، شرحت له وهي تشاور علي النقود والبانجو ، ، كل يوم من ده ياعينيا ينفع ، ضحك ، الا ينفع ، ينفع ونص و.......... وتاب لمونه المسجل خطر الشقي علي ايد كريمه البلانه واصبح مواطن صالح في جمهوريه الحنان كله !!!!
ارسلت كريمه البلانه بت صغيره للناصيه المظلمه ، هناك يقف امين شرطه لابس البدله اللي كانت بيضا وعماله يزعق في الناس انا الحكومه ، قالت لها تناديه ، وقفت البت امامه وهو يصرخ مجنونا ، انا الحكومه ، ابلتي كريمه البلانه عارفها ، هز راسه ، مالها كريمه عايزه مني ايه ، هزت الفتاه كتفها ، معرفش وماقالتش ، قالت لي ازعق عليك واقولك انها عايزاك !!!
فتحت كريمه الباب لامين الشرطه وضحكت بميوعه ، الا ياخويا لا بس الكاب ليه وكابس علي قلبك كده ، ماتفك عن راسك ، الحكومه ماتت ياعين امك وانت عماله تزعق وكأنها لسه عايشه ، لا حد بيعمل لك حساب ولا بيطل عليك ، اتنرفز امين الشرطه حموده وخبط علي الترابيزه وهو يشرب الشاي اللي قدمته له ، عايزه ايه ياكريمه هاتي من الاخر ، جلست بجواره ، جمهوريه الحنان كله ، ضحك ، بتقولي ايه يااختي ، كررت كلامها ، جمهوريه الحنان كله ، جمهوريتنا ، انا وانت ولمونه ، ايد في ايد وضهر في ضهر ، نرفع العلم ونحكم ونتحكم وانا مش حاقولك بقي ولا حاوصيك تعمل ايه .... نظر لها بريبه ، واشتغل تبعك ليه ، هي ناقصه فضايح !!! ضحكت وانت بيهمك الفضايح ، انت وشك مكشوف ، وايدك طرشا ولما كنت بتسرق كان عيني عينك والاتاوه عيني عينك وعبك واسع وكرشك اوسع ، تشتغل عندي علشان انا اللي حالم الليله واضبط الدنيا واكل كلاب السكه يكفوك شرهم وانت تلم الاتاوه قصدي الضرايب والجمارك واللذي منه وترجع موظف محترم بعد مابقيت صايع من يوم ماسرحوك وقالوا الشوارع اللي مالهاش اصحاب ماعدتش عايزه لابوليس ولا امناء !!! تشتغل معايا علشان تأمن ضهري وانا اسد بقك ونقسم علي تلاته واللي يخون مالوش ديه !!!
ناولته سيجاره حشيش ، وقدمت له طبق فته فوقه موزه بتلو وحتتين مخلل ، اكل وشرب الشاي وحبس بالحشيش وانبسط وسالها ، وهو يعني الحنان كله ازاي يعني، قالت له كده ياعيني ، طبق فته وسيجاره حشيش وروقان بال وكل اللي نفسك فيه وغمزت بعينها ففهم وضحك !!!
نادت لمونه وجلسوا معا ، رسموا العلم ، اصفر زي اللمون وجواه قلب كبير ومسدس ، علم جمهوريه الحنان كله !!!
واترسمت الحدود واسعدهم الحظ بجمهوريه واسعه من تلت شوارع وناصيتين وميدان كبير ، لمونه ادب الصيع فبعدوا وحموده حصل الجبايه والضرايب والاتاوه وشعب الجمهوريه كان بيزور بيت كريمه البلانه كل يوم مره واتنين ويعيش في الحنان كله !!!
واستقلت جمهوريه الحنان كله عن الشوارع اللي مالهاش اصحاب واصبحت كريمه البلانه رئيسه جمهوريتها بمعاونه لمونه الشقي وحموده امين الشرطه .................. 

( 5 )
34598 جمهوريه

دخل احدهم مهموما علي رئيس وزراء الشوارع اللي مالهاش اصحاب !!!
النهارده بس ياافندم ، استقلت 23 جمهوريه ، فيه جمهوريات رسمت حدودها من اول وجديد وانقسموا اتنين وتلاته بعد مالناس اتخانقت وقالت دي جمهوريه كبيره ودي جمهوريه صغيره !!!
رفع رئيس وزراء الشوارع اللي مالهاش اصحاب راسه مهموما وساله ، وصلنا كام جمهوريه ، نظر الموظف في الاوراق وقاله ، اخر تقرير من الجهاز المركزي للاحصا بيقول انه لغايه الساعه 8 الصبح كنا وصلنا 34598 جمهوريه !!!
اندهش رئيس الوزراء 34598 جمهوريه في اربعه شهور ؟؟؟
هز الموظف راسه لايصدق اندهاش رئيس الوزراء ، يافندم انت مش عايش معانا ولا ايه ، كل دقيقه في جمهوريه بتستقل ، الناس بتقول بدام ممكن نستقل نقعد مع بعض ليه ، الاستقلال راحه ياروحي والكتمه وحشه !!!
ساله رئيس الوزراء بمنتهي الحزن ، كام واحده فيها اسمها مصر !!!
هز الموظف راسه متأسيا ، ولا واحده يافندم ، ناس سمت الجمهوريات باسم عائلتها او اولادها او باسم حاجه بتحبها ، ناس قالت جمهوريه البحر وناس قالت جمهوريه اخر العنقود وناس قالت جمهوريه الحنان كله ، جمهوريه الكلب الحيران جمهوريه الكتكوت اليتيم ، جمهوريه طنطا بنها مشتول فاقوس اطفيح قصر النيل الانفوشي ، البلد اتقسمت وعماله تتقسم جمهوريات جمهوريات ، شارع شارعين ، ميدان ، عماره ، مكتب في وزاره ، كل واحد رفع علمه وقال دي جمهوريتي وانا رئيسها ، جمهوريات ترأسها ستات وجمهوريات ترأسها رجاله وفيه شويه عيال اعلنوا انهم حيعملوا 12 جمهوريه ويعملوا بيتهم اتحاد فيدرالي وتبقي جمهوريه العيال المتحده !!!
انهمرت دموع رئيس الوزراء ، ماكنتش اتصور كده ابدا !!!!
طبطب الموظف علي كتفه ، يافندم ماهي دي الديمقراطيه بقي ، كل واحد براحته ولا ايه حضرتك !!!
طلب منه ورقه وقلم ، كتب سطرين وسلمه الورقه ، ساله ، ايه ده يافندم ، جفف رئيس الوزراء دموعه وهمس ، مجرد اعلان صغير ، وبحسم وبصوت مرتعش مرتفع وكأنه قوي اكد رئيس الوزراء علي الموظف ، الاعلان ده ينزل في كل الجرايد والمجلات والفضائيات مصري وعربي وعالمي ، فاهم ؟؟؟ طوي الموظف الورقه في جيبه وهز راسه باسي ، فاهم يافندم والله فاهم !!!!

( 6 )
اعلان في كل الصحف والمجلات

يامينا ... ياموحد القطرين اغثنا .. مصر تحتاجك !!!!
تصدرت كلمات رئيس وزراء الشوارع اللي مالهاش اصحاب ودموعه كل الصحف والمجلات والفضائيات مصريه وعربيه ودوليه !!!
يامينا ياموحد القطرين اغثنا .... مصر تحتاجك !!!!
يامينا ياموحد القطرين اغثنا ..... مصر تحتاجك .... مصر تحتاجك .... مصر تحتاجك !!!!!!!!!!
ومازال رئيس وزراء الشوارع اللي مالهاش اصحاب وبعض المخلصين ينتظروا عودة مينا لان ..... مصر تحتاجك .. مصر تحتاجك ... مصر تحتاجك ...................................... مصر تحتااااااااااااجك !!!

ومازال مينا يبكي في قبره
وجميعنا يشاركه البكاء !!!!