مدونة "حكي وحواديت" للكاتبة والروائية أميرة بهي الدين



الخميس، 21 يناير، 2010

صوتي وانا حرة فيه " قصص تبدو واقعية " !!!!!



منهم لله شياطين الكتابة هما وتخريفهم !!!


الناس الشريرين طلعوا اشاعه وقالوا ان الحكومه ال ايه مش ديمقراطيه وال ايه بتبوظ الانتخابات وال ايه بتحاصر الناخبين وبتمنعهم يخشوا اللجان الانتخابيه وبعدين تحط اسم مرشحها في الصناديق وسالمه ياسلامه رحنا وجينا بالسلامه!!!
طبعا اشاعه مغرضه منحطه حقيره جدا ، لان الحكومه مش فاضيه خالص للكلام الفاضي ده ، ولان الحكومه وراها مليون حاجه اهم من الكلام الفاضي ده ولان مرشحين الحكومه - بالمناسبه الحكومه مالهاش مرشحين اللي ليهم مرشحين هو الحزب اللي بيعمل الحكومه وهنااااااااااك فرق كبير جدا منعا للخبطه !!! ماعلينا ، كنا بنقول ايه ، اه بنقول ان دي اشاعات مغرضه جدا وحقيره جدا وان مرشحين الحكومه بيكسبوا بيكسبوا من غير تزوير ولا حاجه ، لانهم محبوبين جدا واللي ربنا يحبه يحبب فيه الحكومه وصناديق انتخاباتها ،كمان سمعت - بس ده سر - ان الحكومه مش حترد علي الاشاعه المنحطه دي خالص واللي حيرد عليها هو الامن المركزي اللي مش بتاع الحكومه ومابيحبش الحال المايل اساسا بتاتا هو اللي حيرد وبمنتهي الوضوح والحسم ، وكل واحد يخلي باله من لغاليغه!!!

المهم ، كنا بنقول ايه ، اه كنا بنقول ان الاشاعه المغرضه دي اثبتت الايام كذبها طبعا !!!
وانا شفت بعيني محدش قالي ، وفي موضوع الانتخابات ده تسال مجرب ولا تسال طبيب !!! ماعلينا !!!

كان فيه مرشحه للحكومه ، وهي كانت حاجه كبيره قوي بس سابقه خالص ، وست صوتها واطي ولا بتهش ولا بتنش والحكومه بتحبها جدا لان صوتها واطي اصل الستات اللي صوتهم واطي دول نعمه واللي يكرهم يعما علي راي خالد الذكر احمد زكي ....
وماعلينا ، كانت الست ام صوت واطي نازله الانتخابات ، وقدامها نزل راجل مشاغب مشاكس بدقن طويله قوي ، وطبعا الحكومه مابتحبش موضوع الدقون ده اساسا لانه مش علي الموضه ومابيستعملش جيليت جي تو !!!!

ماعلينا برضه ، يوم الانتخابات ، حد عبقري وانا بحب العباقره ، قرر يحط اللجان الانتخابيه جوه مبني كبير قوي قوي حواليه سور كبير قوي قوي ، وحضرتك بقي الناخب يعني ، تخش من السور ، وماادراك ومالسور ، تخش من السور ، بس السور مالوش باب ، لا له بوابه كبيره جدا ، بس البوابه مقفوله وسرقوا الصندوق يامحمد لكن مفتاحه مع الحكومه ، افتحوا البوابه مافيش بوابه افتحوا البوابه مافيش بوابه ، طيب افتح ياسمسم ياعدس ياشعير يامهلبيه ، مافيش بوابه ، والناخبين ياحرام اللي مصدقين انهم حيدلوا بصوتهم ويؤدوا واجبهم الوطني عمالين يلفوا حوالين السور يدوروا علي البوابه وعدت ساعه واتنين وتلاته وحد صحته مساعداه قعد يزعق فين الانتخابات فين الانتخابات !!!!
و....... صلي صلي علي النبي صلي ، الناخبين لقوا البوابه ، بوابه صغيره قوي قد الربع رغيف ، وعليهم يجيني الف عسكري ، اوعو حد شرير يفهم انهم قافلين البوابه ، لا طبعا بيحرسوها بس فاهمين بيحرسوها بس !!!
ماعلينا ، عند البوابه ستات كتير محجبات ومنقبات واسدال وشاتدور وهيصه ، كلهم جايين علشان الراجل ابو دقن طويله ، وهما كمان قافلين الباب من بره ، يعني العساكره قافلين الباب من جوه والستات بتوع الراجل ابو دقن قافلين الباب من بره ، واحنا ، مين احنا الستات الفافي اللي لابسين تاير وجينز وجزمه كعب عالي وحاطين روج وعاملين مزبليه عند الكوافير وصوتهم مسرسرع ، احنا عمالين نزعق افتحوا البوابه ....
الحقيقه العساكر كانوا بيحبونا ، يعني مايفتحوش البوابه ابدا ابدا لو واحده من بتوع الراجل ابو دقن تقرب من البوابه لكن احنا شكلنا مطمئن وكمان نسوان حلوه ، فيفتحوا الباب واللي يحب النبي يزق ، زقه اتنين تلاته هيه صلي صلي علي النبي صلي ، تلاقي روحك بقيت جوه السور ، والزعيق والشتيمه شغاله ، وقالك القضاه بيشرفوا علي الانتخابات ، لا القضاه بيشرفوا علي الصناديق ، لكن مين يوصل للصناديق ده موضوع تاني يتولاه الامن !!!

مش موضوعنا دلوقتي موضوع القضاه والصناديق ، نخلينا في اللي الاشاعه اللي طلعت ان الحكومه وحشه مع انها حلوه حلوه خالص خالص ، المهم ، تدخل من السور تلاقي روحك في صحراء الربع الخالي ، ايوه بلد تانيه ، اروح فين ، امشي علي طول لغايه فين لغايه ماتلاقي مبني ، ومافيش مبني وكعب الجزمه عالي ، واه يارجلي ، تسمع حد ابن حلال يقولك ، وانت مالك يامدام والبهدله دي ، تصدق اه والله مالي ومال البهدله دي ، ماعلينا ، جايه تنتخبي مين ، الراجل شكله ابن حلال قوي بس متيهالي كله انه مسجل خطر ، شكله كده ابن حلال مسجل خطر ، ماعلينا طبعا جايه انتخب الست ام صوت واطي حبيبه الحكومه ، براوه عليكي يامدام ، اصل الراجل ابو دقن يعني ولامؤاخذه ، شكله والله مسجل خطر ويمكن كمان مسجل خطرين وكعب الجزمه عالي ومش حاعرف اجري ، باقول لحضرتك ايه ماليش دعوه خالص باابو دقن ، اروح فين بقي ، براوه عليكي يامدام !!!!!!!!!

ومشيت مشيت مشيت علي راي عبد الحليم حافظ مش عارفه في اغنيه ايه وانا بلوم نفسي اتاري الواجب الوطني المقدس صعب جداجدا بالكعب العالي ، متهيالي ان الواجب الوطني كان عايز كوتشي وترينج ، يعني يبقي واجب وطني كووول رياضي ، ماعلينا ، صوابعي فقفئت وتعبت قوي ، وقفت بصيت ورايا ، مافيش نفر ولا نفرايه ، ههههههههههه ، والراجل ابن الحلال المسجل خطر ماشي ورايا زي ضلي ، اصله بيرحب بي الحكومه بعتاه يرحب بالناس ، كتر خيرها الحكومه والرجاله بتوعها المسجلين خطر ولاد الحلال !!!

وصلت المبني ، هيه هيه هيه ، صلي صلي علي النبي صلي ، اللجنه الانتخابيه فين ، سالني الراجل ابن الحلال ، لجان الحريم هناااااااااك ، هنااااااااااك فين ياعم ، في المبني التاني ، ودوخيني يالمونه والله يخرب بيت الواجب الوطني ابو كعب عالي !!!!
المهم ...... شديت الرحال علي المبني التاني وورايا الراجل ابن الحلال ، وصلت المبني التاني لحسن الناس بتزهق من كتر الكتابه ، وصلت المبني التاني ، لقيت علي مدخله شويه ستات ، لا هما مش ستات ،هما نسوان ، شويه نسوان ، يامامي يامامي ، كل واحده تخن الفيل ، بجلبيه واسعه ومنديل وشويه دهب في دراعها قشطه يعني ، واقفين سادين المدخل بتاع المبني ، وراحه فين ياشابه ، استني بس كلميني ، طبعا اللي بتقول كده الست الزعيمه بتاعت النسوان ، دي بقي ست بنت حلال فعلا ، بنت حلال خااااااااالص ومسجله ستين خطر ، بايني شفتها قبل كده فين ، في القفص في المحكمه ، في القسم ، في نصيبه ، مش عارفه ، المهم ، طبعا وقفت مبتسمه بمنتهي الادب ، راحه فين ياشابه ، طالعه فين ، ابتسامه مؤدبه ولطيفه ، طالعه اللجنه ، بصت لي من فوق لتحت ومن تحت لفوق ، وغمزت بطريقه سافله ، حتنتخبي مين ، بسرعه رديت ، الست ام صوت واطي ، ضحكت ضحكه خليعه ، براوه عليكي ياشابه ، واطلعي ياشابه فوق الدور التاني !!!

بصيت ورايا لقيت الراجل ابن الحلال بيضحك مع الست بنت الحلال وخلاص وصل الزبونه بالسلامه !!! المهم طلعت الدورين ، كل سلمه من سلالم الدورين عليها كومه نسوان تبع الست بنت الحلال ، كل واحده قالعه شبشبها وماسكه في ايديها ، ضحكت ، قلت دي موضه جديده ، النسوان تمسك الشبابش في ايديها تهوي بيها في الحر ، ماجاش في بالي خالص انهم عايزين يضربوا حد ويضربوا حد ليه ، ده احنا في انتخابات ديمقراطيه جداجداجدا والناخبين واقفين ورا البوابه واللجان الانتخابيه محدش عارف يوصل لها وكله تمام تمام !!!

ارجع تاني واقول ، ال ايه القضاه بيشرفوا علي الانتخابات ،القضاه جوه اللجان الفاضيه ، واللجان فاضيه ليه لان الناخبين بره ، والناخبين بره ليه ، لان الامن اللي لازم ينظم الدنيا لتبقي غابه ، واقف علي البوابه ، البوابه مالها ماملهاش ، سلامتك ، الله يسلمك ياشابه !!!

وصلت الدور اللي فيه اللجنه ، البطاقه الانتخابيه عليها اسم الشياخه والشياخه مش موجوده هنا ، اللي موجود لجنه ، ليها رقم والبطاقه ماعليهاش رقم ، اعمل ايه من فضلك ، ضحكه ساخره شريره ، دوري علي اسمك ، فين يافندم ، في الكشوف ، ههههههههههههههههههههه مش تقولوا ان الموضوع كده ، حاطين علي باب كل لجنه دفتر تليفون خطه زباله وانا ماعييش نضاره القرايه وال ايه ادور علي اسمي ، بس حضرتك مش شايفه ، امال جايه ليه ، رميت عيني جوه اللجنه ، لقيت السيد القاضي قاعد زهقان جدا ، ليه ، اصل الناخبين ماجوش ، والقضايا متأجله في المحكمه لغايه مالانتخابات تخلص ، يعني لامنه خلص القضايا وادي الناس حقها ولا منه اشتغل انتخابات ، حاجه تزهق ، المهم دورت علي اسمي وصممت صممت ، وياقاتل يامقتول ، لازم حلاقي اسمي ، ربع ساعه نص ساعه ، ههههههههههههههههه ، ال والاشاعه المغرضه تقولك الحكومه بتزور الانتخابات ، والله مالهم حق ، الحكومه نايمه في البيت في التكييف وسايبه النسوان ولاد الحلال والراجل ابن الحلال وزملائه بيتفسحوا وياكلوا علي حساب الشعب والنسوان بتهوي بالشباشب من الحر والقاضي زهقان وكله تمام !!!

وصلي صلي علي النبي صلي ، لقيت اسمي ، ودخلت اللجنه ،السيد القاضي فرح قوي لما شافني ، وانا كمان فرحت لما شفته ، راجع اسمي في البطاقه الانتخابيه واسمي في البطاقه الشخصيه وبمنتهي الدقه اداني ورقه الانتخاب واتفضلي يااستاذه ورا الساتر ، ودخلت ورا الساتر وبوظت صوتي ، لااديته للست ام صوت واطي ولا للراجل ابو دقن ، ههههههههههههه وانبسطت جداجدا ، ده بقي العمل الوطني العظيم اللي فقفئ صوابع رجلي ، اني ابوظ صوتي محدش يعرف يسرقه ، اصل انا مابحبش الستات ام صوت واطي وماباحبش الرجاله امات دقون ، يبقي خلاص صوتي وانا حره فيه ، اغسله اكويه ، وبوظت الصوت !!وخرجت من اللجنه الانتخابيه في منتهي السعاده محلقه من الفرحه ، افسدت صوتي افسدت صوتي !!!!!!

وانا نازله السلم لقيت النسوان اللي بيهوا بالشباشب من الحر ، زهقوا من التهويه ، وباينهم مسكوا حرامي علي السلم وفين يوجعك وهاتك ياضرب ، واتفضلي انتي ياشابه ماليكش مصلحه ، طبعا ماليش مصلحه ، اتاري فيه اتنين ستات ياعيني عدوا كل الحواجز البوابه والامن والراجل ابن الحلال والست بنت الحلال ودخلوا المبني طالعين السلم ، ال ايه مارضيوش يقولوا حينتخبوا مين ، ال ايه ديمقراطيه ، النسوان امات شباشب شكوا فيهم ، واحده منهم صرخت ياولاد الكلب جايين تبوظوا الانتخابات وبس سلامتك عينك ماتشوف اللي النور ، ياحرام الاتنين الستات الناخبات وقعوا في المصيده والشباشب اللي كانت قاعده في ايدين النسوان مالهاش لزمه ، اشتغلت والشبشب الباطل نجس وهاتك يالسع وايه القوه دي وايه الصحه دي ، قطعوا الناخبات ويالا يا ............ يانهار اسود علي الكلام اللي قالوه ، لو كتبته يقفلوا الانترنت اساسا ، جايين ليه ، عايزين ايه ، تنتخبوا مين ياصايعين ياضاييعين ، جايين ليه عايزين ايه ، والشباشب شغاله هاتك ياطرقعه !!!!

وخرجت جري من المبني ، لقيت الراجل ابن الحلال واقف تحت ، من فضلك اطلع منين ، بص لي من فوق لتحت كاني صرصار ولا عبرني ، مش شغله ده يقولي اطلع منين ، شغله يراقب الناخبات ويطمن علي اصوات الست ام صوت واطي ويسلم المشكوك فيهم للنسوان ولاد الحلال امات شباشب !!!!!!!!!!!!!
وبس خلاص .................................
وتاني يوم الست ام صوت واطي اكتسحت الانتخابات ، والراجل ابو دقن سقط ، واتعمل محاضر في الشرطه ضد نساء مجهوله بتضرب الناخبات بتحريض من الحكومه الشريره اللي عايزه تزور الانتخابات ، والراجل ابن الحلال المسجل خطر اتجوز عروسه جديده بعد ماقبض القرشين وقرر يبر نفسه ويبسط روحه !!!!

وانا ؟؟؟؟؟؟؟؟؟؟ انا فضلت ادهن رجلي كريم علشان الفقفئه اللي حصلت بسبب المشي والكعب العالي واخدت عهد علي نفسي بعد كده ، لما اجي امارس الواجب الوطني المقدس تاني وابوظ صوتي لاني مش لاقيه حد اديه له ، حاالبس كوتشي !!!!!!!!!!!!!!
ههههههههههههههههههههههههههههه باحب الانتخابات قوي ، ياي ياي ، مسليه جدا !!!
وعلي فكره طلعت حكايه الحكومه دي اشاعه ، وهي مابتبوظش الانتخابات ولا حاجه وهي ديمقراطيه جدا حتي اسالوا الراجل المسجل خطر!!!!
--------------------

ااقول تاني لحسن حد يظن ان دي قصه حقيقيه ، دي اوهام تخاريف ، لم تحدث اطلاقا في الحقيقه ، كلها قصه وهميه دراميه منحطه لانها بتشوه الواقع الجميل اللي احنا عايشين فيه ، بس نقول ايه بقي في شياطين الكتابه منهم لله هما وتخريفهم !!! هذه قصه وهميه لم تحدث ورجليا مش مفقفئه ولا حاجه خااااااااااااااااااااااااالص
بس بجد بجد باحب الانتخابات مووووووووت ، اصلها مسليه جداجداجداجدا !!!!!!!

هناك تعليقان (2):

غير معرف يقول...

يعني مافيش قدامي غير اني اموت م الضحك
خفه دم متناهيه
واوعي تقولي ان حضرتك بتخافي ولا حاجه
احنا لاحكومه تهمنا ولا سجون تلمنا
احنا بتوع الاتوبيس يابيه
عاطف ابوشهبه

عمادخلاف يقول...
أزال المؤلف هذا التعليق.