مذكرات خادمه صغيره !!!!!!
هو الاسم مش كفايه ....
انا عارفه اسمي ، كده كفايه جدا ، محدش عمره سالني سؤال تاني ، اسمك ايه يابت ، نوره ، عاشت الاسامي يااختي ، تعيش يابيه ، بس خلاص ، يفرق ايه بقي اي حاجه تانيه ، مولوده امتي ، معرفش ولاحد يعرف ، اتولدت لماامي ولدتني ، بس خلاص ، امتي ، يفرق في ايه ، لا حاخش المدرسه ولا حاطلع بازابورت ، اسمي نوره بنت ام نوره !!!!
مش فاكره جيبت من البلد امتي ولا جيت ليه ، امي سحبتني زي البهيمه ويالا علي مصر ، شالله يااهنل البيت زرنا وملسنا علي المقام ومارجعناش البلد ، لا امي رجعت وانا فضلت ، سابتني واتنقوزت عليا لما عيطت ، يابت حتاكلي لقمه نضيفه وتلبسي هدمه نضيفه والسلام عليكم ، بس خلاص ، انا هنا لوحدي ، مع ناس اغراب ، بقوا اهلي وناسي وكل الدنيا ، ساعات بانسي شكل امي ، بحاول افتكر شكلها بانساه ، طبعا اخواتي خلاص ،نسيتهم خالص ،حتي لما رحت البلد نوبه عام نول ، رحت مالقيتهمش ، كلهم نزلوا يزوروا اهل البيت ومارجعوش تاني ، امي قاعده تربي في بط ووز وتبيع وابويا يشرب كيفه ويضربها واحنا كلنا ، كل قورطه البنات دي زارت اهل البيت ومارجعتش ، نسينا شكل بعض ويمكن كمان الاسامي ، فيه سنيين بقي عدت علي مااتقابلنا تاني !!!!
المهم الاغراب اللي بقوا كل الدنيا ، كل شويه يعملوا هيصه ودربوكا ولا مولد سيدي الهربان ، زغاريط ورقص وشمع وباسطه وعيد ميلاد مين الليله ، النهارده الست الكبيره وبكره ست الحاجه وبعده عيد ميلاد البت الصغيره اللي من دوري ، وهدايا وهيصه ، وارقصي يانوره ارقص ونضحك وناكل البسطه وخلاص !!!
في يوم اسود ، كنت باودي الفطار للست الحاجه ، لقيت البنات قاعدين جارها وحواليها ، تعالي يابت يانوره ، انت عيد ميلادك امتي ، ضحكوا واتنقوزوا علي ، طبعا انا مش عارفه ، ولو سالوا امي كمان حتطلع مش عارفه ، معرفش ، لغايه كده وعادي ، شويه نقوزه وضحك وبس ، لكن البت الصغيره اللي من دوري اتلدعت في قلبها وصرخت ، انا حاخلي عيد ميلادها في شهر عيد ميلادي ، ضحكوا قوي وانا معاهم ، انا الصراحه يعني ماكنتش فاهمه بيضحكوا ليه ولا يعني ايه اللي بيقولوه ، لكن انا اتعودت كده لما يضحكوا اضحك ، اصل مره ضحكوا ومضحكتش ، شتموني وقالوا نوره البجمه ، وانا مااحبش اكونه بجمه ، الا بحق بجمه يعني ايه ، مش مهم ، المهم من يوميتها ، يضحكوا اضحك وخلاص ، البت قالت اللي قالته ونزلوا كلهم ضحك ، لكن البت اللي فوق راسها علي طول ، ودايما تكيدها ، قالت لا ، نورا حتبقي معايا في نفس الشهر ، ضحكت لوحدي ، هما ماضحكوش ، ضحكت وبرضه ماكنتش فاهمه ، الست الحاجه شتمتهم وقالت لا نورا انا اللي اختار عيد ميلادها دي خدامتي وانا حره فيها ، كله كوم والحاجه كوم ، محدش يقدر يكسر لها كلمه ، قلت وماله ياست الحاجه عيني ، لكن البت المزغوده لوت بوزها ، وقالت لا ، نورا معايا انا ، اتخانقت هي والبت اللي فوق راسها ، والحاجه زعلت واتقمصت اصل هي مخها صغير قوي ، فسفس يعني ، لما تحط راسها براس البنات تبقي اعيل منهم !!!!
دخلت الست الهانم الاوضه ، لقت بنتينها شابطين في بعض وامها لاويه بوزها ، بصت لي وهاتك ياشيتمه ، ماهو اكيد انا السبب ، الحاجه قالت لها نوره مالهاش دعوه ، دول بناتك قللات الادب ، بيقاوحوني ، الست اندارت علي بناتها وهاتك ياشتيمه الا فرنكه ، شتيمه عمري مافهمت معناها ، البنات بصوا لستهم واتصالحوا مع بعض وهاتك ياخناق ، ال ليه وليه ستهم تحشر امهم بينهم ، والخناقه ولعت في البيت ، الست تتخانق مع بناتها والبنات يتخانقوا مع ستهم وانا واقفه بحقيقي بقي زي البجم النوبه دي مش فاهمه حاجه خالص !!!
دخل الواد الصايع ابن الست ، الواد الصايع اللي طول النهار يبص لي بصات قله ادب ، دخل لقي امه واخواته وجدته هاتك يازعيق ، فيه ايه ايه اللي حصل ، قالوا له وهما بيتخانقوا وانا نازل علي سهم الله ، الواد بص لي بصه قليله ادب وقال لا نوره معايا ، عيد ميلادها معايا انا ، ياحزني ياامه ، الواد قارح وعينه تندب فيها ميت رصاصه وعودين قصب ، الواد بيقول كلامه وبيبص لي وانا عامله هبله ومش فاهمه حاجه ، ماهو حتي لو فهمت وقلت اني فهمت واشتكيته لامه ، عمرها ماتصف معايا ضده ، يبقي خلاص قله الكلام احسن ، الواد يبص لي بصات قليله ادب ويقول نوره معايا ، سته قفشته ، ماهي ولية عقر برضه ، ايه قله الادب دي واقف تتمايص علي البت واحنا موجودين ، الواد لاانفزع ولا اضطرب ولا كانها قالت حاجه ، ضحك كانها بتزغزه ، امه خدت بالها من الكلام ، سابته واندارت علي ، واقفه هنا ليه يابجمه ، بتشاغلي الواد واحنا واقفين ، كله نسي الحكايه وانداروا علي ، بت قليله الادب ، انا ؟؟ ليه ، هو انا اللي بصيت له ، الحاجه تصرخ لا ابنك قليل الادب ، الست تصرخ ، كله من جلابه المصايب دي ، الواد يضحك ولا فارق معاه ، المزغوده تبص لي وتطلع لي لسانها ، شمتانه في ان امها بتشتمني ، طيب والله لاقول لامك انك ابن الجيران بيعاكس وانت مستحيله المعاكسه ، ولا انا مالي لا قايله ولا عايده ، الخناقه شدت اكتر ، وكله هاتك يافحت وردم في بعضه ، وانا واقفه زي البجمه !!!!
زعقوا زعقوا وبعدين نزلوا كلهم علي فاشوش ، ورجعنا لحكايه الدبانه ، عيد ميلاد نوره ، خصيمكم النبي مالازمني عيد ميلاد ، لا نوره في شهري ، لا شهري انا ، ياحشريه يابايخه ، عيب يابنت ، دي خدامتي وعيد ميلادها معايا ، الواد قليل الادب يسبل ويقولي لا عيد ميلادها معايا ، وزعيق زعيق زعيق وفجأ لقيت روحي باصرخ ، مش عايزه ، مش عايزه عيد ميلاد كتر خيركم !!!
سكتوا حبه وانفجروا في الضحك ، ال ليه وليه بازعق فيهم ، الحاجه قالت البت اتهبلت امشي انجري من هنا يابت ، الست قالت ادي اخره معاملتكم الحلوه للبجمه البت نسيت روحها وبتزعق فينا ، المزغوده طلعت لسانها وسرسرعت لامها وقالت ، هي كده دايما بتقاوح ، الواد الصايع بص وقال حرام عليكم نوره ماعملتش حاجه وغمز لي !!!!
اليوم خلص وبعده الف يوم ، وكل مايجي حفله عيد ميلاد حد منهم ، يتفكروا اليوم الاغبر ده وينزلوا خناقه ، وعيد ميلاد نوره امتي ؟؟؟؟؟!!!
سايق عليك النبي ياامه تفتكري عيد ميلادي امتي علشان نخلص من الموال الاسود ده !!!!!!!!!!!
ليست هناك تعليقات:
إرسال تعليق