مدونة "حكي وحواديت" للكاتبة والروائية أميرة بهي الدين



الجمعة، 25 سبتمبر، 2009

محطة مصر !!!!ا




انتبهت لوجودها لمكانها لمشاعرها خايفه وتايهه ومحتاسه ، سمعت الوصايا العشر وحفظتها وسمعتها الف مره ماتصدقيش حد ماتثقيش في حد ماتآمنيش لحد فتحي عينيك كويس خلي بالك صحصحي واوعي تغفي قلبها بيدق ... خايفه جايز .. متوتره احتمال ...

واقفه وحيده في الزحمه ... بتتفرج .. بتتفرج ..الناس بتجري ورايحه جايه طالعه نازله ... تضحك وتعيط ..

اجراس وصفير ووش ورغي ودوشه تخوف ومن كتر الخوف هي واقفه ثابته مكانها ...

واقفه وحيده تتفرج علي اللي بيحصل حواليها قطر وصل متاخر ... دايما بيوصل متآخر قطر مشي بدري مالحقتوش ... مش مهم اكيد فيه غيره جاي وحيستناها وحيده وخايفه ... تتفرج علي الناس ده بينشل ده وعملت انها ماشفتش حاجه ، دي بتعيط وهو حاضنها لكن بيبص قوي علي رجلين البنت التانيه اللي قدامه ، جري وراها علي القطر ونط في العربيه بتاعها والبت اللي بتحبه لسه واقفه بتعيط تودعه ، طفل بيصرخ لان الجو حر وهو عايز حاجه ساقعه ، امه بتجر من دراعه يمكن كمان حتسحله تحت القطر اللي حيمشي ويسيبها وهي مش تضيع الرحله بسبب زن يخلص بقلمين ...

قعدت علي الدكه الخشبيه ، صوت دقات قلبها اعلي من صوت القطر خايفه من المكان اللي كلهم حذروها منه لان هناك كل حاجه بتتسرق وتضيع قعدت خايفه.. خايفه .. تتحرك .. خايفه علي فلوسها وفستانها وقلبها وروحها كل الناس بتجري وتركب ، تضحك وتعيط ، تودع وتستقبل ، وهي خايفه مرعوبه ثابته مكانها مابتعملش حاجه بتتفرج والوقت بيجري .. وهي قاعده مكانها والقطارات بتمشي ... وهي قاعده مكانها ، والناس بتحب وتفرح وتهجر وتزعل ... وهي قاعده مكانها والفلوس في الكيس مابتفتحوش ومابتشتريش بيها حاجه وماعداش ليها قيمه عندها لانها خايفه عليها تتسرق فمابتعملش بيها حاجه كل حاجه حواليها بتتحرك وهي قاعده مكانها ...

خايفه بتسمع الوصايا العشر نفسها تقوم وتجري ... ترمي الوقت تحت عجلات القطر وتتخلص من حمل تقيل علي اكتافها تشتري بالفلوس حمام ابيض وتطيره في السماء وتضحك وطظ في الفلوس نفسها تشتري زماره ورق وتطبل وتهيص وتضحك وتعيش نفسها تقوم تودع ناس ماتعرفهومش علشان تعيط نفسها تبتسم تستقبل ناس مايعرفوهاش علشان تحضنهم وتضحك نفسها تعيش جوه المحطه وتنطلق ويلعن ابو الوصايا العشر لكنها خايفه والوقت بيعدي خايفه والعمر بيعدي خايفه !!!

اقتربت منها عجوز بجلباب اسود كالح جلست بجوارها فتحت حقيبتها واخرجت نحله ملونه ورمتها علي الارض وقالت لها اجري امسكيها ضحكت بخجل وامسكت بحقيبتها بقوه .. زقتها العجوز وقالت لها اجري امسكيها تابعت النحله تجري تجري تلف تلف وهي مربوطه في الدكه الخشبيه ، قامت العجوز تجري وتضحك وهي تتابعها باعجاب وحقد وحب لكنها مربوطه في الدكه الخشبيه ، رجعت العجوز سعيده ممسكه بالنحله .. فتحت حقيبتها واخرجت لها شوكولاتايه وعزمت عليها ، ارتبكت .. فأهم الوصايا العشر لا تاخذي شيئا من الغرباء ... !!!

اصرت العجوز وقطمت منها حته وضحكت وقالت لها...طول ماانت خايفه من كل حاجه وخايفه علي كل حاجه عمرك ماحتنبسطي قومي ... سلمي علي الناس اللي مابتعرفيهومش احضنيهم العبي مع العيال علي مالقطر يجي اركبي قطر غلط محطتين وانزلي تاني اشربي ميه مش نضيفه حيجيلك شويه مغص كلي حته شوكولاته من ايدي استطعميها وعيشي عيشي يابنتي عيشي وبطلي خوف لا تخافي علي الوقت لان الوقت طويل لاتخافي علي الفلوس لان الفلوس لتتصرف لتتسرق لاتخافي من الناس لان فيهم الوحش قوي قوي لكن فيهم الحلو اللي يسعدك لو ابتسم في وشك قومي يابنتي عيشي و.......... القت النحله ثانيه من الحقيبه وضحكت وصرخت فيها ... قومي هاتيها وكفاياك خوف

و................

في محطه مصر ... حراميه ونشالين يسرقوا الكحل من العين وفيها بشر وحيدين وفيها مودعين ومستقبلين

وفيها ساعات بتجري وساعات ثابتين وفيها شباب فرحانين وفيها عواجيز متمردين

وفيها اطفال بتتضرب وفيها امهات حنينين

وفيها بنات نفسها في كلمه حب

وفيها لقاء وحنان ودموع وطيبه

وفيها قصصت حب انتهت وقصص حب خالدين

وفيها الوصايا العشر اللي بتموت البني ادمين

وفيها بنت طيبه قوي وقلبها اخضر قوي ونفسها تعيش وتفرح وتودع وتستقبل وتحب وتتحب
فيها بنت طيبه قوي حتقوم من مكانها وتنسي الخوف وتجري ورا النحله وتلعب بيها وتضحك ...

................... وبحثت عن العجوز لم تجدها

لكنها وجدت النحله والشوكولاته علي الدكه الخشبيه ومعهما قلب نابض بالحب ينتظر من يفتح ابوابه الموصده!!!!

رمت النحله علي الارض وقامت تجري خلفها وهي تضحك تتناثر فتافيت الشوكولاته من فمها من كثر الضحك والابواب الموصده للقلب الطيب تفتح ببطء .....

فالحياه في محطه مصر مليئه بالتناقضات لكن مليئه بالدفء ...

واه من مكان جليدي نتصور انه امن فنموت من كثره الصقيع و..........يامحطه مصر احبك وحيويتك وصخبك .....

ومازالت تجري ورا النحله وتضحك !!!!! ونسيت الوصايا العشر والفلوس والوقت والرعب !!!!!


" الي حبيبتي الطيبه !!! "

ليست هناك تعليقات: