تيجي نلعب ......
تيجي نلعب عصافير .....
انا عصفوره حلوه طبعا ، ريشي ملون ، منقاري احمر اصلي حاطه له روج ، هههههههه...
انت عصفور وحش .... ههههههه ... ريشك رمادي .... منقارك اسود لون شنبك !!!!!!
هههههه يالا نطير زي العصافير ..... استني بس ماتطيرش بسرعه قوي كده ، انا عصفوره صغنونه مابعرفش اطير بسرعه استناني .... ايوه كده تعالي طير جنبي ....
تيجي نقف فوق الشجره العاليه دي .... هههههه ... الللله حتديني الورده الحمرا دي احطها وسط ريشي الملون ... انت عصفور لطيف قوي .... هههههههه لاماتقربش مني كده لحسن بابايا العصفور الكبير يزعل منك وينقر لك راسك ويضربك بجناحه انت ماتعرفش جناحه قوي قد ايه !!!
هههههه انت بتغني ..... الللللله .... بتغني لي ...... انا كمان بعرف اغني ..... يالا نغني سوا ......... الللله حلوه الاغنيه دي ..... صوتك حلو قوي ... انت عصفور جميل وصوتك جميل ... اه ريشك رمادي ومنقارك اسود لكن جميل !!! ايه ده الريح قامت ... الشجره بتتهز ..... حنقع علي الارض والناس تدوسنا .....
ههههههه صحيح ده احنا عصافير ... حنطير ومش هتهمنا الريح ... قرب مني لاني خايفه ... اخش تحت جناحك وتحميني ؟؟؟؟؟ .... ايه ده حنغني واحنا خايفين .... طيب نغني ... حنبطل نخاف لما نغني ..... الللله صوتك جميل .... الللله صوتنا بقي اعلي من صوت الريح !!!! انا عصفوره صغننه لكن مابقيتش خايفه وانت معايا حتي وسط الريح !!! عارف تلاقي الريح هي اللي بقت خايفه منا واحنا سوا ..... يالا نغني بصوت اعلي واعلي ... !!!! تيجي نطير سوا .... تعرف تضحك وانت بتطير !!! انا كمان باعرف !!!! تيجي نضحك واحنا بنطير !!! اصلي باحب اوي الطيران والضحك !!!
هههههههه نروح فين ..... نقف علي البحر !!!! الناس حتضحك علينا ... عصفوره جميله وعصفور وحش واقفين مع بعض علي شط البحر !!! مش مهم راي الناس !!! انت رايك كده !!! خلاص يالا نطير للبحر !!!!
بس والنبي ممكن نضحك واحنا بنطير !!!!! ها ها ها ها .... هي هي هي هي ... شايف النخله الحلوه دي ، تيجي نستريح عليها ، انا حاقعد علي الفرع الاخضر ، حاسب الشوك يعورك ، حتجيب لي فتفوته بلح ، اكلها ؟؟؟ لا كلها انت ؟؟؟؟ ناكلها سوا .... انا حته وانت حته !!! اللللله حلوه قوي لعبه العصافير دي !!!!! حتجيب لي حته كمان !!! ايوه عارفه طبعا انت العصفور الراجل وانا العصفوره الست ، انا العصفوره الحلوه اللي بيحبها العصفور الوحش !!! لكن انا بحب اطير معاك واضحك معاك واغني معاك واكل فتفوته البلح اللي بتجيبها !!! انا اللي بتطمن لما تفرد جناحك وتحميني من الريح !!!!!
زهقت من النخله ..... عايز نطير تاني ، بس اوعي تنسي تضحك واحنا بنطير .... يالا غني وانا حارد عليك ....
هههههه صوتك وحش لكن بيضحكني !!! لا صوتك حلو وبيبسطني !!! لا انا صوتي وحش انا عارفه ، مش مهم انه وحش ، انت رايك كده ، انا بحبك لانه مش فارق معاك ان صوتي وحش !!! انا كمان مش فارق معايا ان ريشك رمادي !!! اصل كان فيه عصفور ازرق عامل فيها ابو علي ، فرحان بنفسه ، كل شويه يطير قدام العصفورات اصحابي يطبش في الهوا ال يعني بيعمل استعراض ، احنا قررنا نطنشه ، اصله عصفور بايخ ومش مهم لون ريشه ايه ، لكن انت عصفور طيب !!! وانا بحبك !!!!
عايزنا نقف علي البلكونه دي ، انا لسه ماتعبتش انت تعبت ؟؟؟ علشاني عايزني استريح !!! اللللله رجاله العصافير طيبين خالص !!!! نقف !!!! تيجي نغني واحنا واقفين !!!! يالا نغني !!! شايف البنوته الحلوه اللي قاعده في البلكونه ، يلا نغني ليها ، هههههههه شايف ضحكت ازاي !!! البنوته انبسطت منا ، شايف جابت لينا طبق فيه ميه ازاي ، هههههههه ، دي جابت لينا رز ... انا حاجيب لك رزايه ، انت حتجيب لي رزايه .... شيلها جوه منقارك تحت جناحك علشان رحلتها طويله لغايه البحر......
هي البنوته ليه بتتفرج علينا كده ، ياسم ، ايه البواخه دي ، عمرها ماشافت عصافير قبل كده ، يالا يالا نطير ونغني ونضحك ........ اللللللله ... جميله قوي السما وجميل قوي الشجر وجميل قوي الطيران معاك ، هي كل حاجه جميله فعلا والا هي بقت جميله لاننا بنطير سوا !!!!
خلاص قربنا من البحر .... البحر اهو .... نرقص !!! لا لا انت عصفور مجنون بجد !!! نرقص علي البحر !!!!
الناس حيقولوا علينا مجانين ، عصافير بترقص علي البحر ، مش مهم الناس اه انت قلت كده ، طيب تعرف ترقص ، مش مهم ، خلاص مش مهم ، يالا نرقص ، انت تغني واحنا نرقص ، جناحي تحت جناحك .... كمان منقاري في منقارك !!! ده مش رقص بقي !!! ههههههههههه رقص... طيب !!!
انت بتقول ده رقصه جديده حتعلمها لي ، احط منقاري في منقارك ونرقص !!! طب حتغني ازاي !!! طيب حبه كده وحبه كده ، شويه نرقص عادي وانت تغني وشويه نرقص منقاري في منقارك !!!! تعالي نقرب من البحر شويه ، يااااااه شايف الموجه عملت في ايه ، طرفت عيني بنقطه ميه مالحه ، اي عيني حرقتني ، ههههههه ، ايه دي رقصه جديده كمان ، تنفخ في عيني ، مش رقصه ، انت عصفور طيب ، وانا بحبك علشان بتعلمني الرقص وبتنفخ في عيني!!!!!!!
بقولك ايه ، انا عجبتني رقصه منقاري في منقارك ، خلاص بقي بلاش تغني وخلي منقارك في منقاري !!!!!
شايف الاطفال بعيد بيبصوا علينا ازاي ...... دول جايين جري علينا ...... ياماما ... ايه ده ماسكين معاهم ايه ؟؟؟؟؟ يالا نجري !!! يالا نطير!!!!!!
اي اي اي ....... الاطفال الشريرين ضربونا بالنبله !!!
اي ... وجعتك .... مابتردش ليه .... رحت فين ....
ياشريرين ياوحشين ..... عورتوا عصفوري الطيب ابو ريش رمادي !!!!
ياشريرين ياوحشين ..... انا طايره لوحدي وهو مرمي علي الارض وانا مش عارفه انزله لانكم حتضربوني !!!
قوم ياعصفوري قوم ..... ياشريرين ياوحشين ..... موتوا عصفوري الطيب !!!!!!!!
اهي اهي اهي ............... كانا يجلسا في حديقه واسعه كبيره .......
يجلسا متقابلين ..... حولهما اشجار ضخمه !!!
كانت تبكي بحرقه رهيبه حزينه بحق كان عصفورها الطيب مات ... عجوز بيضاء الشعر مجدعه الوجه تبكي بحرقه!!!
كان الرجل الاشيب العجوز يجلس امامها يواسيها يطبطب عليها " احنا كنا بنلعب ومحدش جراله حاجه"!!!!
لم تتوقف عن البكاء وارتفع صوت نحيبها " اطفال شريره "!!!
ضحك فغضبت منه فهون عليها " خلاص نلعب بكره لعبه تانيه مافيهاش اطفال شريرين"!!!
هزت راسها توافقه " اه ... وحشه لعبه العصافير دي علشان الاطفال الشريرين موتوا عصفوري الطيب!!!"
وانفجرت في البكاء بصوت اعلي ..... كانا يجلسا في حديقه واسعه كبيره علي مقاعد متحركه ، عجوزين وحيدين عاجزين محتجزين في دار المسنين وحيدين قليلي الحيله لايجدا مايفعلاه في وقتهما الطويل !!!
اقتربت منهم الممرضه ، كانت مازالت تبكي ، لامته الممرضه " تاني زعلتها !!!"
نهرت الممرضه " انت مالك بينا ، هو مازعلنيش ، ده عصفوري الطيب "
وابتسمت له " انا باحب اللعبه دي ، لعبه العصافير ... عايزه بكره نلعبها تاني " !!!
وافقها ابتسمت ابتسامه اوسع وعيونها مليئه بالدموع " وعد ؟؟؟؟؟؟!!!!!!" !!!!
ليست هناك تعليقات:
إرسال تعليق